Shillong, Lber 24
Ka jingpynbna ka BJP na Delhi ban nym pynïeng kyrtong ha ki ar tylli ki konstitwensi ha Meghalaya da kaba kyrshan noh ïa ka National People’s Party (NPP) ka lah ban don ka jingïapher jingmut khamtam ha Tura Lok Sabha konstitwensi namar ka BJP ka ju kynthoh ïa ka NPP man ka por.
Katkum ka tyllong khubor, la ong ba ka don ka jingdiaw ïa kiba bun ki nongkitkam bad nongkyrshan ka BJP ha Jylla hadien ba ka BJP na Delhi ka la shim ïa ka rai ban nym pynïakhun kyrtong ha kane ka ilekshon.
La ong ka don ka jingïakynduh ha Tura hapdeng ki nongkitkam ka BJP ban ïakren shaphang ka jingphah ki nongïalam na Delhi ban kyrshan ïa ka NPP ha Tura bad ha Shillong Lok Sabha konstitwensi.
La ong ruh ba ka BJP ha Garo Hills ka long kum ka Liang Pyrshah wat lada ka donlang ha ka Sorkar MDA-II.
Ha ka jingshisha ki don bun ngut kiba la pan tiket ban ïakhun ïa ka ilekshon Lok Sabha na Tura bad kumjuh na Shillong. Da ka jingrai ka BJP na Delhi, ka jingpynkhreh ka BJP ha Meghalaya ban ïakhun ïa ka ilekshon sha ka Ïingdorbar Lok Sabha ka la shu bijai ei.
Ka kyrtong ka NPP na Tura, ka Agatha K Sangma kan ïakhun pyrshah ïa u kyrtong ka Congress u Saleng A Sangma bad u kyrtong ka Trinamool Congress u Zenith Sangma.
Wat lada ka rai jong ka BJP na Delhi ka long ban kyrshan ïa ka NPP, hynrei ka jingkylli ka long hato ka NPP kan ïoh pura ïa ki ‘vote’ na ka BJP ha Rilum Garo?
Kumta ka tyllong khubor ka ong ba ka don ruh ka jingbymhun ha Shillong haba ïadei bad ka rai ban nym buh kyrtong. Ki don ki nongkyrshan ka BJP ha Shillong kiba pynpaw ba ki phaikhmat sha ki seng saiñ pyrthei kiba don ha ka ri baroh kawei kum BJP ne Congress namar ha ka ri baroh kawei kiba ïakhun ki dei beit ka BJP bad ka Congress.
Hynrei da ka jingbym ïakhun ka BJP ha Shillong, kiba bun ki nongkyrshan ka BJP kin phaikhmat ban ai ‘vote’ kat shaba ki sngewmon namar yn nym lah ban ngiat lut ïa ki nongkyrshan sha ka NPP.
