Shillong, Lber 24
Ka Mawlai Sports Club bad ka Ryntih Sports Club ki la ïahun noh ban sam mar shi poiñ hadien ba ka jingïakhun ha ka lympung Shillong Premier League (SPL) kaba la long ha ka sngi Saitjaiñ ka la kut noh ha ka jingïa-khaid da mar shi kol.
Haba phai sha kane ka jingïalehkai kaba la long ha madan SSA, Polo, ka jingïalehkai ka la long kaba itynnad bad ïakhaid bha, ha kaba baroh arliang mamla ki la ïakhun tyngeh naduh kaba sdang hynrei kim shym la lah satia ban pynkhih jar haduh ba kut jong kylla step.
Haba bteng ïa ka kylla miet, ha ka minit kaba 49 ba ka Mawlai ka la ïoh ban khyrwit ïa ka kol kaba nyngkong ba la thep da u Khrawkupar Jana. Nangta ka jingïalehkai ruh ka la sdang ban shongshit bad itynnad bad ha ka minit kaba 66, ka Ryntih ka la ïoh ban pynphai ïa kane ka shi kol lyngba u Yami Longvah.
Wat hadien ba ki la ïoh ban thep mar shi kol, ki rangïalehkai na baroh arliang ki la bteng ban ïakhun tyngeh bad wad ïa ka kol kaba ar bad ki la ïoh katto katne ki kabu hynrei kim shym la lah ban pynurlong.
Nalor kitei ki shi kol, na ka liang ka Mawlai bad ka Ryntih ki la ïoh ban thep kol hynrei ym shym la kheiñ satia namar ba ka dei ka ‘Offside’ bad wat la ym shym la kheiñ hynrei ka la pynlong pat ïa ki nongkyrshan ban muja bad shongshit haba ai jingkyrshan ïa la ki jong ki club.
