New Delhi, Lber 24
Ka Bharatiya Janata Party (BJP) ha ka Sngi U Blei ka la pynmih ïa ka thup kyrteng kaba san jong ki kyrtong ki ban ïakhun ha ka ilekshon MP Lok Sabha.
Napdeng kiba la ïoh tiket ban ïakhun ki kynthup ïa ka tyngshop ka Bollywood, ka Kangana Ranaut, ka ban ïakhun na Mandi ha Himachal Pradesh, u nongbishar ba la iehnoh kam ka Calcutta High Court, u Abhijit Gangopadhyay, u ban ïakhun ha Tamluk ha West Bengal, u tyngshop jong ka ‘Ramayan’, u Arun Govil, u ban ïakhun na Meerut, Uttar Pradesh bad kiwei.
Ha kane ka sngi, ka BJP ka la pynbna ïa ki kyrteng jong ki 111 ngut ki kyrtong na ki 17 tylli ki jylla ba kynthup ïa hynriew ngut na Andhra Pradesh, 17 na Bihar, 21 na Odisha, bad 19 na West Bengal.
Hynrei ka seng ka la pynduh tiket ïa u Varun Gandhi, uba dei u MP na Pilibhit, katba ka dang pynneh ïa ka kmie jong u, ka Maneka Gandhi, kum ka kyrtong na Sultanpur. Ha ka jaka jong u Varun, ka BJP ka la pynïeng da u Jitin Prasada, uba ju don mynshwa bad ka Congress, bad uba long ruh u Myntri sorkar ha Uttar Pradesh.
Kiwei pat ki MP kiba la shah pynduh tiket ki long ki Myntri Sorkar Pdeng, u Ashwini Kumar Choubey bad u General VK Singh, bad u Myntri Sorkar Pdeng barim, u Anant Kumar Hegde. Hynrei u Myntri Sorkar Pdeng, u Giriraj Singh, un ïakhun biang na Begusarai katba u Myntri barim, u Ravi Shankar Prasad un ïakhun biang na Patna Sahib ha Bihar.
