Shillong, Lber 24
Ka Royal Rajasthan ka la lah ban pynliem noh ïa ka Lucknow Super Giants da 20 run ha ka lympung ïalehkai Indian Premier League (IPL) kaba la long ha ka Sngi U Blei ha Sawai Mansingh Indoor Stadium.
Kane ka nam jop jong ka Rajasthan ka la wan lyngba ka jinglah ban ïalehkai bha u Sanju Samson (82 run na 52 bol) bad ruh ka jinglah jong ki nongkawang bol ki jong ka, ban tehlakam ïa ki nongtied ka Lucknow.
Haba phai sha ka jingïalehkai, ka Rajasthan kaba la tied nyngkong ka la lah ban kamai run haduh 193 na 20 tylli ki over bad hap 4 wiket. U Sanju Samson u la tied 82 run na ki 52 tylli ki bol, u Riyan Parag u la tied 43 run na ki 29 tylli ki bol bad u Yashasvi Jaiswal u la tied 24 run na ki 12 tylli ki bol, katba u Naveen-ul-Haq la khur 2 wiket na ki 4 over bad u Ravi Bishnoi bad Mohsin Khan ki la khur mar shi wiket.
Haba beh ïa kane ka thong, ki nongtied ka Lucknow Super Giants ki la lah ban kamai tang 173 run na ki 20 over bad hap haduh 6 wiket, kaba la pynlong ruh ban shah rem noh da 20 run.
U Nicholas Pooran u la tied 64 run na ki 41 tylli ki bol, u KL Rahul u la kamai 58 run na ki 44 tylli ki bol bad u Deepak Hooda u la tied 26 run na ki 13 tylli ki bol katba u Trent Boult u la khur 2 wiket bad u Sandeep Sharma bad Yuzvendra Chahal ki la khur mar shi wiket.
U Sanju Samson uba la lah ban ïalehkai bha bad tied palat 80 run ha kane ka jingïalehkai, u la ïoh ban khur ïa ka khusnam ‘Player of the Match’.
