Shillong, Lber 24
Ka seng Voice of the People Party (VPP) ha ka Sngi U Blei ka la kynthoh kylla ïa u kyrtong MP ka Congress na Shillong Parliamentary Constituency, u Bah Vincent Pala, hadien ba u la kynnoh ba ka VPP bad ka BJP ki ïasyriem ha ka saiñpyrkhat ka jong ki.
“Kane ka jingkren jong u kyrtong ka Congress ka pyni ba um don jingtip eiei ïa ka nongrim jong ka seng ka jong u bad jong ka BJP. Hashwa ba un ai ïa ki jingkynthoh bym shong nongrim, la sngewdei ban ai jingmut ïa u ba un wad bniah shwa aïu ka seng jong u ka la leh. Nga kwah ban shu ai jingmut ïa u ba un pule ïa ki jingthoh jong u Ajaz Ashraf (2016), Milind Ghatwai (2023), Ajay K. Mehra (2023) bad kiwei,” la ong u nongaiktien ka VPP, u Dr Batskhem Myrboh, ha u kyrwoh khubor.
U la ong ba ha kitei ki jingthoh, la pyni ba ka Congress ka pyntreikam ïa ka saiñpyrthei kaba ki khot ka ‘Soft Hindutva’.
“Ka long ka jingshisha ba watla ka Congress ka kam ba ïeng na ka bynta ka jingim hapdeng kiba bun paid khlem da peit shiliang ïano-ïano, hynrei ynda la poi halor ki mat ki jura kiba ïadei bad ki kynhun rit paid, ka la leh da kumwei,” u la ong.
U la pynkynmaw ba ka Congress ka la don ha ka bor synshar ha Delhi bad ha Meghalaya la bun phew snem, hynrei ka khlem ai jingithuh ïa ka ktien Khasi bad kiwei pat ki ktien jong ki ‘riewlum ha ka Khyrnit Ba Phra jong ka Riti Synshar.
Nalorkata, u la ong ba dei namar jong ka Congress ba ym shym la lah ban pyntreikam ïa ka Inner-Line Permit (ILP) ha jylla. Ha u snem 2013-14, u la ong ba ka sorkar Congress ha Delhi bad Meghalaya ki la pyrshah jur ïa ka jingdawa jong ki paidbah ban pyntreikam ïa ka ILP.
Shuh shuh u Dr Myrboh u la ong ba dei na ka daw jong ka seng Congress ba ka Meghalaya ka hap ban mad jingeh namar ka jingpyntreikam ïa ka Citizenship Amendment Act ha jylla. U la ong ba ka jingpyllait ïa ki jaka ba hap hapoh ka Khyrnit Ba Hynriew kam don jingmut khlem da pynjari shwa ïa ka ILP.
