New Delhi, Lber 24 (UNI)
U Myntri Rangbahduh ka ri, u Narendra Modi ha ka Sngi Saitjaiñ u la pynrem jur ïa ka jinghiar thma ki lehnoh ïa ka nongbah ka Russia, Moscow bad ong, “Ka India ka ïeng tylli lang kawei bad ka Sorkar lem bad ki nongshong shnong ka Russian Federation ha kum kane ka por ka jingsngewsih.”
Katei ka jingjia ka la jia ha ka miet Sngi Thohdieng hadien ba ka kynhun kieng atiar ki shynrang ka la rung sha Crocus City Hall, ka jaka pynlong ïa ka jingïaput ïatem kaba ha Moscow bad sdang ban siat pathar ha ryngkat ka jingpynbthei bom.
“Ngi pynrem jur halor kane ka jingthombor ki lehnoh ha Moscow. Ki jingmut-jingpyrkhat bad ki jingduwai jong ngi ki don bad ki longïing jong ki lanot. Ka India ka ïeng tylli lang kawei bad ka Sorkar lem bad ki nongshong shnong ka Russian Federation ha kum kane ka por ka jingsngewsih,” thoh u Modi ha ka rynsan lad pathai ‘X’.
Palat spah ngut ki briew ki la ïap namar katei ka jingjia.
Ha kawei ka liang, ka ISIS ka la kam ïa ka jingkitkhlieh halor katei ka jingthombor ha ka kyrwoh ba la buh da ka Amaq News Agency, da kaba ong ba ki nongïakhun jong ka ki la hiar thma ïa ki khap sor jong ka Moscow, “ban pynïap bad pynmynasaw ïa ki spah ngut bad kaba la ïalam sha ka jingjulor kaba khraw ïa katei ka jaka hashuwa ba kin mih noh sha la ki jaka da kaba suk ba saiñ.”
