Moscow, Lber:
U President ka Russia, u Vladimir Putin ha kane ka kynti u la maham pyrshah ia ka thaiñ Sepngi baroh kawei ba lada ka US kaba lam khmat ia ka kynhun NATO, kan leit ïadon bynta biang ne ai jingkyrshan ia ka Ukraine ha kane ka sien iakhun thma jong ka Russia bad Uk-raine ha kane ka por, u la maham jur ba ka pyrthei kam slem shuh ban um ha ka Thma-Bah Balai (Third World War).
Namar la ong ba ka thma Russia bad Ukraine ha kane ka por, ka la pynsaja ia ka Russia bad ka la shah pynsah marwei ha baroh ki liang namar kiba bun hi ki ri jong ka pyrthei ki la kyntait ban iatrei lang bad ka Russia bad ki la pynkut noh ruh ia ki jingiadei kam jongki bad ka Russia kaba ki la ïadon bynta bad iatrei lang ha baroh shi katta ki snem ba la leit. Namar kata ruh la ong ba ka Russia ka la byrngem na ka por sha ka por ba khlem pep bad khlem pynslem shuh ruh ka Russia kan sa sei bad pyndonkam noh da ki tiar thma Nuclear kiba khlaiñ bor tam bad ynda ka la leh ia kane, ka pyrthei baroh kawei kan khih win bad hangta, kan khie ka Thma-Bah Balai.
Haba iadei bad kane, u President ka France- u Emmanuel Macron ha une u bnai ba la lah u la pynpaw ia ka jingkyrshan tylli kaba ka France ka don haba iadei bad ka Ukraine. Namar u la ong ruh ba kiba bun ki ri ki la kiar na ka ban ai jingkyrshan ia ka Ukraine hynrei ka France kan ïeng bad kito ki ri kiba kloi ban iarap bad ai jingkyrshan ia ka Ukraine khnang ba ka Ukraine kan ym khyllem ha ka jingiakhun jongka pyrshah ia ka Russia.
Haba la buh jingkylli ia u Putin pat halor katei ka jingkren jong u Macron bad hato ka jingleit ai jingkyrshan jong ki ri ka thaiñ Sepngi kan wanrah ne em ia ka thma hapdeng ka Russia bad ki ri ka NATO, u Putin u la jubab bad ong ba kane baroh ka long kaba kloi ban jia lada kitei ki ri ka NATO khamtam ka US, kim shym sangeh ban ai jingkyrshan ia ka Ukraine.
Kumta, ha katei ka sngi ba u la ioh ban iakren bad ki lad pathai khubor, u la ong ba u tip ba ka pyrthei baroh kawei ka smiej bad par ñiangkhriat lada iakren shaphang ka ‘Thma-Bah Balai’ bad kumta ki dei ban pdiang ia ki jingmaham jong ka Russia lada ki kwah ban lait na katei ka thma kaba jur.
