Shillong, Lber 24
Ka Cricket Lovers Cricket Club bad ka Hurdles Cricket Club ki la ïoh ban khur ïa ka jingjop ha ka lympung 3rd District League T20 Cricket Tournament 2024 ba la pynlong da ka East Khasi Hills Cricket Association ha Smit.
Ka Cricket Lovers CC kaba la jop ïa ka jingkynting pisa ka la kam trai ban tied nyngkong bad na ki 20 tylli ki over ka la kamai haduh 248 run bad hap tang shi wiket.
Ka jinglah ka Cricket Lovers ban kamai bun run ka dei lyngba ka jinglah ban tied bha jong u Rohit Yadav, uba marwei u la lah ban tied haduh 101 tang na ki 55 tylli ki bol bad u Muksodul Choudhary ruh u la tied haduh 71 run tang na ki 29 tylli ki bol katba tang u Dalumbor Kharpran ka Thynroit uba la ïoh khur ïa ka shi wiket na ki 4 over bad ai 44 run.
Haba beh ïa kane ka thong kaba heh, ki nongtied ka Thynroit Cricket Club kim shym la lah satia ban shan hakhmat ki nongkawang bol ka Cricket Lovers bad ban hap lut ki wiket baroh tang na ki 6.1 over bad kamai tang 21 run, kaba la pynlong ïa ka Cricket Lovers ba kan jop da 227 run. U Rohit Yadav uba la tied palat spah run, u la khur ïa ka khusnam ‘Player of the Match’.
Haba phai pat sha ka jingïalehkai kaba ar jong kane ka sngi, ka Hurdles CC kaba la jop ïa ka jingkynting pisa ka la kam trai ban tied nyngkong bad na ki 20 tylli ki over ka la kamai 199 run bad hap noh 4 wiket.
U Nangsanshaphrang Kynter marwei u la tied haduh 95 run na ki 60 tylli ki bol bad u Sandy Stone Kharshandy u la tied 39 run na ki 19 tylli ki bol katba u Fervent Rymbai u la khur shi wiket bad ai 28 run na ki 4 over.
Haba beh ïa kane ka thong kaba heh, ki nongtied ka Marbisu Cricket Club watla ki la pyrshang hynrei ha kaba kut na ki 19 tylli ki over ki la lah ban kamai tang 103 run bad hap noh 5 wiket. U Shalenbor Kurbah u la tied 22 run na ki 22 tylli ki bol katba u Ricky Stone Nongbet u la khur 2 wiket bad ai tang 12 run na ki 4 over.
Kane ka la pynlong ïa ka Hurdles CC ban jop da 96 run ïa ka Marbisu bad ha kane ka jingïalehkai ïa ka khusnam ‘Player of the Match’ la ïoh da u Nangsan Kynter.
