Nongstoiñ, Lber 24
Ka KSU-West Khasi Hills District Unit hapoh ka jingïalam u Samla Wanbhakupar L. Nonglait uba dei u Organising Secretary ha ka jingsynran lang u Samla Mixz Samakha uba dei u Finance Secretary, ha ka 23 tarik u Lber ka la leit ban khynra Work Permit, Labour License ïa ki nongtrei bar jylla kiba trei ha ka shnong Sohparu (Nongstoiñ) kiba pyntrei ïa kawei ka skul ba la tip kum ka Residential School ba la pyntrei da kawei ka kompeni ba la tip kum ka WAPCOS Limited na West Bengal.
La ong ba ha katei ka jingkhynra, ka seng ka la lap ba la jan kot shispah ngut ki bar jylla kiba wan trei ha katei ka jaka bad napdeng kitei kiba bun kim don satia ki kot ki sla kiba biang.
Kumta na ka liang ka seng ka la phah leit phai noh ïa kitei bar jylla sha ki jaka ba ki wan ryngkat ka jingmaham ïa katei ka kompeni bym bit ban wan rah nongtrei bar jylla palat ïa ka NOC ba la buh da ka shnong hangtei bad dei ban thep kham bun da ki Khasi kiba la lah ban trei ha katei ka jaka ne ïa katei ka kam.
Ka KSU ka la ong ruh ba halor katei ka kam, kan dang ïai pynlong ïa ka jingbuddien ban leit peit biang ha kiwei ki sngi bad lada lap ba ki pynkheiñ, ka seng kan shim da ka lynti kaba kham tyngeh.
