Shillong, Lber 24
Haba kynthoh ïa ka rai jong ka BJP ban ïatreilang bad ka NPP ha ka ilekshon MP ha Meghalaya bad ha kiwei pat ki jylla, ka seng Voice of the People Party (VPP) ha ka Sngi U Blei ka la ong ba kine ki artylli ki seng saiñpyrthei ki la don lypa ka jingïadei naduh u snem 2012 ha ka por ba u (L) Purno Agitok Sangma u la ïakhun ïa ka ilekshon President ka Ri India da ka jingkyrshan jong ka BJP.
“Naduh katei ka por, ka la don ka jingïadei kaba jan hapdeng ka BJP bad ka NPP kynthup halor ka mat jong ka Citizenship Amendment Act,” la ong u Dr Batskhem Myrboh, nongaiktien ka VPP, ha u kyrwoh khubor.
Haba phai sha ka rai jong ka BJP ban ym pynïeng kyrtong bad ban kyrshan ïa ki kyrtong ka NPP na Shillong bad Tura Parliamentary Constituency, u Dr Myrboh u la ong ba ki don ar bynta ha kane. Ka banyngkong ka long ba ka BJP kam sngewthikna ban jop ïa ka ilekshon MP tang nalade bad namarkata, ka donkam ïa ka jingïarap jong kiwei pat ki seng saiñpyrthei wat lada ki dei ki barit, bad kaba ar ka long ba ka NPP ka donkam ïa ka pisa kaba bun na ka BJP ha kane ka ilekshon.
“Lehse ka NPP ka la pynlut ïa ka pisa ha ka ilekshon MLA ha Meghalaya bad kiwei ki jaka. Ka NPP ha Meghalaya ka ïohnong na ka jingkyrshan jong ka BJP namar kan ïoh ïa ka pisa ban pynlut na ka bynta kane ka ilekshon,” la ong u nongaiktien ka VPP.
Shuh shuh u Dr Myrboh u la pynkynmaw ba ka NPP ka dei ka seng kaba wat ka nongrim jong ka, ka la kylla bamsap bamngem bad ka seng kaba don hapdeng ka jingkulmar jingmut.
“Kaei kaba pynïaid ïa kane ka seng haduh mynta ka dei tang ka bor jong ka pisa. Ki bun kiba tip ba kito kiba ‘vote’ ïa ka NPP, ki ‘vote’ tang namar ka pisa bad ki jingmyntoi bym hok kiba wan lyngba ka jingbat ïa ka bor synshar, bad namarkata, ka donkam pisa man la ka por khnang ban neh ha ka bor,” la ong u Dr Myrboh.
Nalorkata, u la ong ba ka NPP ka don jingkyrmen ba ki nongkyrshan jong ka BJP kin ai ïa ka ‘vote’ ka jong ki sha ki arngut ki kyrtong MP ka NPP.
“Lyngba kane ka jingïatreilang, ka NPP-BJP ka kyrmen skhem ba kito ki paidbah kiba pyrshah ïa kane ka jingïatreilang ba kynthup ïa kito kiba kyrshan ïa ka VPP, kin tieng bad kin phai khmat noh sha ka Congress. Ha kane ka rukom, kan don ka ‘vote’ (Rational & Secular Votes) ka ban pait hapdeng ka VPP bad ka Congress, bad namarkata, ki kynhun Hindutva kin jop da kaba suk,” u la ong.
Hynrei, u Dr Myrboh u la ong ba ki nongthep ‘vote’ ka Shillong Parliamentary Constituency ki dei ban lah ban sngewthuh ïa ka jingpyrkhat jong ki bor Hindutva.
“Ka la long kaba donkam ïa ki nongthep ‘vote’ ba kin kyrshan ïa ka VPP namar dei tang ma ka, kaba lah ban ïakhun pyrshah ïa ki seng bad ki kynhun kiba pynpharia ïa ki nongshong shnong. Baroh ki tip ba ka Congress ka dei ka bym don bor shuh ha jylla hadien ba u kyrtong ka Congress u la ïarap ïa ka NPP bad ki bor Hindutva ban khie rasong ha Meghalaya,” la ong u nongaiktien ka VPP.
Shuh shuh u la ong ba kano-kano ka ‘vote’ ka ban leit sha ka Congress kam dei tang ka jingpynlehnohei, hynrei ka long kumba ïarap kylla ïa ka jingïasyllok ki bor Hindutva, kata, ka NPP-BJP.
