Shillong, Lber 24
Ki pulit ki la kubur ba ka jingdon ki kor ki bor ka juk mynta ki ïarap ha ki jingtohkit ban lapdien ïa kiba donkti ha kiba bun ki kam pyntriem bad kam runar kiba lah ban pynthut ïa ka jingshong shngaiñ.
Kane ka jingpynpaw ki pulit ka dei hadien ka jinglap shuh shuh ïa ki briew kiba pyndonkam ïa ki kor ki bor ban leh ïa ki kam beaiñ da kaba don jingïadei bad ka Hynñiewtrep National Liberation Council (HNLC).
U SP ka East Khasi Hills district u Rituraj Ravi, u la ong ba ki briew kiba thmu ban leh ki kam beaiñ ki la nang stad ban pyndonkam ïa ki buit jong ki, hynrei ka long kaba bakla lada ki pyrkhat ba ki pulit kim lapdien ïa ki.
U Ravi u la ong ba lada don kiba pyndonkam ïa ki kor ki bor ban khring sha ka HNLC ban leh ïa ki kam beaiñ, ki la ngat lypa namar ka tnat pulit ka peitngor bad buddien ïa ka rukom pyndonkam jong ki ïa ki kor ki bor.
Namar kata, u la kyntu ïa ki samla ban nym ngop ha ki jingshah ïalam bakla khamtam ha ki seng beaiñ kiba thmu ban leh ïa ki kam pyntriem bad pynthut ïa ka suk ka saiñ.
U SP u la ong ba ki pulit ki la nang lapksai ruh ïa ki briew kiba siew pisa sha ki kynhun bad seng lehnoh, bad u kyntu ïa ki ban kiar na kaba siew pisa namar ka long kum ka jingaibor ïa kita ki kynhun ban leh ïa ki kam beaiñ.
U la ong ba haba don ka jingshah dawa pisa, dei ban pyntip sha ki pulit ym ban shu sngap namar lada kohnguh ïa ka jingdawa, ka aiñ ïa kita ki briew kan trei beit bad kin ngat ha ki kyndon kiba ïadei bad ki seng kiba leh ïa ki kam pyntriem.
Kumta u la kyrpad biang ïa kino-kino kiba shah dawa pisa ba kim dei ban siew sha kino-kino ki kynhun lehnoh. Lada ki siew pisa da kaba aidaw ha ka kyrteng ka jingtieng, ma ki hi kin ngat ha ka aiñ bad kim lah ban kam ïalade ba ki dei kiba ngat ha ka lanot (victim).
