Itanagar, Lber:
Shi bynta ban ïaid beit ïaid ryntih ka ilekshon ka ban wan na ka bynta ka Lok Sabha kaba 18 bad ka Legislative Assembly kaba 11 jong ka Arunachal Pradesh, la ïoh ban kurup ïa ki bitor kyiad bad ka pisa kaba la jan kot sha ka T. 40 lak da ki kynhun Flying Squad ha Pasighat kaba don ha Arunachal Pradesh shwa ban pynlong ïa ka ilekshon.
Ka kynhun pulit ka la ïoh ban kurup ïa kine ki jingdih pynbuaid bad ka pisa naduh ki khyndiat sngi ba la leit, ha kaba la kurup noh ïa ka pisa kaba T. 31,95,700 bad ka kyiad phareng kaba ka kot sha ka T. 32,410.
Kumba la ïathuh ka tyllong khubor kaba la wan na ki heh pulit, la ong ba ha ka jingleit khynra kaba la long ha ka sngi Palei la ïoh ba kurup ïa ka pisa kaba T. 1,50,000 ha ka thaiñ Mirmir Charali, T. 29,69,700 hajan Kalibari, kaba don ha ka thaiñ Hi-Region bad T. 76,500 ha ka thaiñ Raneghat.
Ha kaba ïadei bad kane, ha kum kine ki jingjia, la ïoh ruh ban kurup ïa ka pisa kaba T. 3.75 lak da ka kynhun Flying Squad ha Namsai, Arunachal Pradesh ha ka 20 tarik, Lber. Ka jingleit khynra sha kylleng ki jaka ha kane ka por shwa ban pynlong ïa ka ilekshon ka la nang ïai bteng.
