Shillong, Lber 24
Hadien ka jingbym lah ïalehkai bha ka kynhun ïalehkai ka Jylla ha ka lympung Santosh Trophy mynta u snem, ka Meghalaya Football Association (MFA) ha ka Sngi Saitjaiñ ka la shim ïa ka rai na ka bynta ban jied ïa ki rangïalehkai kiba kynsai na ka lympung Meghalaya State League 2024 ki ban sa mihkhmat pat ïa ka kynhun ïalehkai ka Jylla sha katei ka lympung.
Haba pynpaw sha ki lad pathai khubor hadien ba la kut ka jingïalang jong kane ka Synjuk, u Vice President Bah Cliff u la pynpaw ba ka Synjuk kan hap ban jied ïa ki rangïalehkai kiba kynsai na ka MSL bad ba kin dei ruh kiba dang kham khynnah.
Wat la ka Meghalaya ka la wan ha ka kyrdan ba ar ha u snem ba la lah, hynrei mynta u snem kam shym la lah ban ïalehkai bha ha ka wat ba khatduh (final round) bad ka jingïaid lynti ka kynhun ka la kut noh tang ha ka jingïalehkai group ne group stage.
Te kumta ka Meghalaya ka la hap ban sdang biang naduh kaba sdang; kaba mut ba kan hap ban ïaknieh rung biang sha ka wat ba khatduh jong kane ka lympung ka ban wan.
Halor ka jingpynpaw da kiba bun ki paidbah riew ieit phutbol ba ka MFA ka dei ban don la u jong u Coach uba laitluid bad u bym don bynta bad ki klob, kitei ki nongïalam ka MFA ki la pynpaw ba baroh ki coach ki dei kiba ïadon bynta bad ki klob, hynrei ha ka jingïalehkai dei ki rangïalehkai ki ban ïalehkai bha bad u coach u dei uba shu ai jingmut bad ban ai jinghikai ïa ki nongïalehkai.
