Shillong, Lber 24
Ka lympung ïalehkai Shillong Premier League (SPL) 2023-24 ba la pynïaid da ka Shillong Sports Association (SSA) kan bteng biang lashai ka sngi ka 25 tarik ha First Ground (SSA Stadium) kaba ha Polo, Shillong.
Ka jingïalehkai ha kane ka sngi kan long hapdeng ka Nongthymmai Sports Club pyrshah ïa ka Nangkiew Irat Sports Club ha ka por 3 baje janmiet.
Lah ban pynkynmaw ba ha ka jingïalehkai kaba nyngkong, ka Nongthymmai ka la shah rem noh da 1-0 kol hakhmat ka Rangdajied United FC bad ka Nangkiew Irat pat ka la jop ïa ka Sawmer Sports Club da 2-1 kol.
Kumta ka jingïalehkai hapdeng kitei ar tylli ki club ka ban long lashai ka sngi, la khmih lynti ba kan long kaba itynnad bad ïakhaid bha khamtam na ka liang jong ki rangïalehkai ka Nongthymmai ki ban ïakhun tyngeh ban wad ïa ka jingjop kaba nyngkong eh ha kane ka lympung. Kumjuh ruh ka Nangkiew Irat Sports Club kan ïaleh ban bteng ban khur ïa ka nam jop.
