Shillong, Lber 24
U MDC barim jong ka Umsning bad u nongkitkam ba hakhmat jong ka NPP ha Umsning konstitwensi, u la pynpaw ïa ka jingkyndit haba u Bah Donbok Khymdeit uba dei President ka UDP Ri Bhoi District u la mih noh.
U la pynkynmaw ha ka por ba u dang don ha ka UDP, u Bah Donbok u ju ong ba lada u mih na ka UDP un nym rung shuh sha kiwei ki seng saiñpyrthei hynrei un shu shongthait noh. Pynban u la kyndit ban ïohi ha ki lad pathai khubor ba un mih noh na ka seng kaba u ju ïaineh naduh mynshwa.
“Nga pdiang sngewbha ïa u Bah Donbok Khymdeit bad ka kynhun kiba la mih na ka UDP ban rung sha ka NPP” u la ong.
U la ong ba kine ki nongïalam ka UDP haba ki mih ki ïohi ïa ka jingbym lah ki nongïalam kane ka seng ba kin ïalam ïa ka jylla.
Nalor nangta, u la ïathuh ba ha ka Lah Sngi U Blei ka 25 tarik Lber, ka NPP kan pdiang ïa shibun ngut ki nongkyrshan ka UDP na Umsning konstitwensi kiba la mih noh.
U la ong biang ba lada u Bah Donbok Khymdeit uba dei uba ieid ïa ka seng riewlum u mih noh ka la eh ban batai bad kane ka pyni ba ka UDP kam lah khie-khlieh shuh ha Ri Bhoi bad hapoh ka jylla.
Kum ban shu pynkynmaw, u Bah Donkupar Sumer u la mih noh na ka seng UDP namar u la kynnoh ba u Bah Donbok Khymdeit u la kham noh tarajur sha u Bah Sunshine Makri ban ai tiket na Umsning konstitwensi ha ka ilekshon MLA 2023 da kaba pynduh tiket noh ïa u.
