Nongpoh, Lber 24
U MLA jong ka Jirang konstitwensi, Bah Sosthenes Sohtun, u la pynpaw ïa ka jingsngewkhia jur halor ka jingwan pynpra ki bor ba dei khmih ka Sorkar Assam ïa ka ‘signboard’ jong ka pung dohkha kaba don ha Maikhuli bad ruh ka jingpynsangeh ïa ka jingpyntrei jong ka skhim Water Resources ka jylla ha ka shnong Hawla kaba hap ha ki thaiñ khappud jong ka Jirang konstitwensi ka Ri Bhoi District bad ka jylla Assam.
Da ka mynsiem jong ka jingsngewkhia halor kane ka jingleh jong ki bor sorkar ka Assam, u Bah Sosthenes Sohtun ha ka Sngi Saitjaiñ, u la leit ban jurip ïa katei ka shnong Hawla bad ha ka Sngi U Blei u la hiar pat sha Maikhuli ban jurip bad ïohi dalade markhmat ïa kitei ki jingthombor jong ki bor sorkar ka Assam bad ruh ban ïakren bad ki briew shnong halor kitei ki jingjia.
U Bah Sosthenes u la ïathuh ba u la pyntip bad ujor ïa kane ka jingleh jong ki bor Sorkar ka Assam sha u Myntri Rangbah ka jylla, u Conrad K Sangma bad kyrpad ba un shimkhia ban ïakren bad pynbeit ïa kane ka kam bad ki bor sorkar ka Assam namar kumba long mynta ka jingïakren pynbeit pud hapdeng kine ar tylli ki jylla, kata ka Meghalaya bad Assam ka dang ïaid shaphrang bad don ha ka lynti ban poi noh sha kaba kut.
Haba shimkhia halor kane ka jingjia, u Bah Sosthenes u la bthah ruh ïa ki bor pynïaid District ka Ri Bhoi lem bad ki bor pulit ba kin pynlong ïa ka jingjurip ha kitei ki shnong khappud bad ïathuh ruh ba hadien ka jingpyntip ka jong u sha u Political Secretary ka sorkar jylla, u Bah CVD Diengdoh bad sha u Deputy Commissioner ka Ri Bhoi bad hadien ka jingïakren hapdeng u Deputy Commissioner ka Ri Bhoi bad u Deputy Commissioner ka Kamrup, utei u heh sorkar ka Kamrup u la kular ban pynshna ïa ka ‘signboard’ jong ka pung Maikhuli kaba la pynpra da ki bor ba dei khmih ka Sorkar Assam.
Hynrei na ka liang u Bah Sosthenes u la ai jingmut pat ïa u Deputy Commissioner ka Ri Bhoi ba un bthah ïa u Block Development Officer ka Umling C&RD Block na ka bynta ban shna thymmai ïa katei ka ‘signboard’ bad ym ban ap ïa ki bor sorkar ka Assam kumba katei ka pung dohkha ha Maikhuli kadei kaba dang hap ha Ri Bhoi District jong ka jylla Meghalaya bad kaba la pyntrei lyngba ka skhim Mahatma Gandhi National Rural Employment Guarantee Scheme (MGNREGS) jong ka Umling C&RD Block.
U Bah Sosthenes u la ai ruh ka jingïaroh sha ki nongshong shnong ka Maikhuli kiba la ïakhun pyrshah ïa ka jingwan thombor ki bor sorkar ka Assam da kaba ong ba ka jingshlur ka jong ki naduh ki samla, ki longkmie bad ki rangbah kan pynkhlaiñ shikatdei ban ïada ïa ka khyndew ka shyiap jong ka jylla Meghalaya ha kine ki thaiñ khappud.
Shuh shuh, u Bah Sosthenes kum u nongmihkhmat jong ka Jirang konstitwensi u la pynpaw ruh ïa ka jingkyrmen skhem ba lyngba ka jingshimkhia jong u Myntri Rangbah ka jylla, u Conrad K Sangma, ka jingpyntrei ïa ka skhim jong ka Water Resources ha ka shnong Hawla kan sdang biang khnang ba ki paidbah nongshong shnong ha kine ki thaiñ khappud kin ïoh jingmyntoi.
