Shillong, Lber:
Ka Social Stock Exchange (SSE) jong ka National Stock Exchange (NSE) ka la jam sa sha uwei u mawmer da ka jingrakhe ïa ka jingshah jied bad pynrung kyrteng ha ka kyrdan ba nyngkong haduh basan ha ka NSE-Social Stock Exchange (SSE) Platform – da ka Swami Vivekananda Youth Movement (SVYM), Transform Rural India, Mukti, Ekalavya Foundation; bad SGBS Unnati Foundation. Kane ka lympung kaba kyrpang ka la long ha ka Headquarter jong ka National Stock Exchange’s (NSE) ha Bandra Kurla Complex (BKC), Mumbai, kaba long ka jingrakhe ïa ka sienjam ba kyrpang ha ka liang ka jingkheng pisa ïa kaba la leh khnang ba yn lah ban ïoh ïa ka jingmyntoi.
Ka jingshah pynrung kyrteng ka la ïalam sha ka jinglah ban ïoh ïa ka jingbei tyngka kaba long 8 klur tyngka na ka bynta ki projek pynroi bapher bapher ba kynthup ha ka liang ka pule puthi, ka jinghikai pyntbit ïa ki sap ki phong, ka rep ka riang, ka kamai-kajih, ka jingpynkup bor ïa ki kynthei bad kiwei kiwei.
Ha kane ka lympung la ïashim bynta da ki riewpawkhmat kum ka Madhabi Puri Buch, Chairperson jong ka SEBI, Dr. R. Balasubramaniam, Chairman jong ka SEBI’s Social Stock Exchange Advisory Committee, Ashwani Bhatia, Whole Time Member (WTM), SEBI; bad u A Balasubramanian, MD & CEO jong ka Aditya Birla Sunlife AMC, ha kaba kane ka rynsan ka la ïarap ba wan rah lang ïa ki heh ki haiñ, ki nongtrei bad ki nongmihkhmat na ki NPO bad kiwei kiwei kiba la ïadon bynta lang.
Ha kaba ïadei bad kane ka jingjop, ka myntri ka tnad Finance bad Corporate Affairs, ka sorkar India ka Nirmala Sitharaman, ka la ban jur da kaba ong, “Ka jingai khublei ka leit sha ki san tylli ki seng treimon sngewbha- ka Swami Vivekananda Youth Movement, Transform Rural India, Mukti, Ekalavya Foundation, bad SGBS Unnati Foundation kiba la shah jied ha ka rynsan jong ka Social Stock Exchange (SSE) ka NSE. Ka jingnoh synñiang na ki nongai sngewbha sha kane ka kam ban pynmih pisa lyngba ka SSE ka la ïoh ïa ka jingïaroh kaba khraw.”
