Jowai, Lber 24
Uwei u nongñiah trok u la shah pynïap dusmon bad ka trok kit dewbilat kaba u la ñiah ka la shah rahbor noh ha uwei u runar ha ki bynta ka Nagaon distict ka Assam ha ka 22 tarik Lber.
Une u nongñiah trok u dei na Jowai, West Jaiñtia Hills ïa uba la tip kyrteng kum u Nicholas Dkhar.
Ki bor pulit hadien ba la ïoh jingtip na u trai jong ka trok, ki la lapdien noh ïa kane ka trok napoh Pub-Deopani hajan Kaziranga National Park, Assam bad kem noh ïa u briew uba donkti.
U runar uba donkti ha kane ka kam bymman u dei uba kyrteng u Raju Nath na Pandu, Guwahati. U la leh ïa kane ka kam pyntriem da kaba pyndonkam da ka ‘Wheel Wrench’ kaba don hapoh katei trok shwa ba un rahbor noh ïa ka kali.
“U Raju u don ïa ka jingthmu ban rah ïa kane ka trok sha Jorhat na ka bynta ban die beaiñ ïa ka mar sha katei ka jaka,” la ong uwei u heh pulit.
Kane ka trok kaba don ïa u Registration Number NL01-AA6213 ka dei kaba kit dewbilat na Meghalaya bad da ka jingthmu ban leit pynhap sha Suraksha Cement (KD Cement) hapoh Samuguri kaba ha Nagaon district ha ka step jong ka 22 tarik mynta u bnai.
“Hynrei u trai jong ka trok u Gurdeep Singh u la lapdien ïa kane ka trok lyngba u GPS bad ïohi ba ka la jam palat ïa ka jaka kaba dei ban leit ha kaba u la pyntip noh mardor sha ngi. Ngi la pynlong ka jingbeh thong bad lapdien ïa kane ka trok ha Deopani shwa ban poi ha Bagori,” la ong u heh pulit.
U heh pulit u la ong ba ïa kane ka trok la rah noh shapoh thanat bad la kem noh ïa u Raju hadien ba u trai jong ka trok u la pynthikna ba um dei satia u nongñiah jong u. Ha ka jingtalasi ki pulit ki la lapdien ïa ka metïap napoh ka jaka ba la shna kyrpang jong ka trok. Hadien la pynkynriah noh ïa ka metïap na ka bynta ban leh ïa ka post mortem.
Une u heh pulit u la ong ruh ba u Raju Nath u dei u runar uba la paw bha.
Kham hashwa u la shah kem la bunsien halor ka jingdonkti ha ki kam rahbor ïa ki trok. Hynrei, ka long kaba sngewlyngngoh kumno ba u la ïohlad ban rung hapoh katei ka trok. U la ïathuh ha ngi ba u don u briew uba la phah synran lem ïa u nongñiah jong ka trok na Shillong bad ba u la synran lang ïa u naduh Shillong,” la ong u heh pulit.
“Mynta ngi dang pynlong ka jingthwet ïa utei u briew uba la phah synran ïa u Raju bad katei ka trok. Hynrei haduh mynta hi ym pat shym la lapdien ïa u bad ka ‘mobile phone’ jong u ruh ka la lip naduh katei ka sngi ba la jia katei ka jingjia,” la ong shuh shuh u heh pulit.
