Moscow, Lber:
Katkum ki khubor, la ong ba ka Islamic State ha ka Sngi Saitjaiñ ka la shim ia ka jingkit-khlieh halor ka jingleit synreit kuli bad jingther bom hapoh ka tamasa lehkmen ‘Concert Hall’ ha ka nongbah Moscow jong ka Russia kaba la jia ha ka janmiet Sngi Thohdieng.
Ha kane ka jingjia, palat 143 ngut briew ki la duh ia ka jingim.
La ong ba ki dkhot jong ka IS ki la leit ban ialum lypa ha ki thaiñ khappud jong ka nongbah Moscow ban ioh leit rung bad pynlong ka jingthombor kaba jur ha katei ka jaka ba don ka tamasa bad ka tem ka put ha katei ka sngi.
Hynrei la ong ba kitei ki lehnoh ki la ioh ban phet krad biang noh na katei ka jaka khlem kano-kano ka jingktah ia ki ha katei ka sngi.
Ka tnat National Guard jong ka Russia ka dang shu pyntip shen ba ka la leit ban peit thuh ia ka jinglong-jingman jong katei ka jaka bad kan thwet bad buddien ruh ia baroh kito kiba don kti ha katei ka kam thombor.
Ha katei ka jingjia, la ong ba kitei ‘riew kieng atiar ki la leit ban synreit kuli naphang sha ki paidbah kiba dang ialeh kmen bad peitkai ia ka tamasa tem-put kaba don ha Shathie jong ka nongbah Moscow.
Ha kane ka jingjia kumba 143 ngut ki la khlad ha shen, katba 100 tam pat ki dei kiba la mynsaw bad don kiba khlad ynda la pynkit sha ki jaka sumar bapher bapher.
La ong ba kitei ki ‘riew kieng atiar ha katei ka sngi ki la leit rung jubor ha katei ka jaka bad sdang synreit kuli. Hadien kata pat ki la kawang da ki bom ‘Grenade’ sha ki jaka ba shong ki paidbah nongpeitkai ha katei ka jaka.
Ki bor pyniaid ki la iathuh ba ka Russia ka la dep ioh jingmaham lypa halor ki kam thombor jong ki lehnoh na ka tnat wad bniah hynrei kim poi pyrkhat ba kan leit jia noh ha katei ka sngi.
