Bengaluru, Lber:
U Myntri Rangbah jong ka Karnataka u Siddaramaiah u la pynshisha da kaba ong ba ka BJP ka la tyrwa mar T. 50 klur sha ki MLA jong ka Congress kaba bat ïa ka bor synshar ha katei jylla, bad kular ruh ïa ki ban ai jingkyrshan pisa na ka bynta ka jingïakhun ïa ka ilekshon shiteng samoi, kum shi bynta jong ka jingpyntreikam ïa ka ‘Operation Kamala’.
“Balei ba ki jingleit khynra jong ka Income Tax ka la jia tang ïa baroh ki seng ka liang pyrshah? Hato ki briew kiba kamai spah da ka lynti kaba beaiñ ki don tang ha ka kynhun jong ka liang pyrshah? Hato ym don mano-mano ruh napoh ka seng BJP? Ka BJP ka dei u kpa jong ka bamsap, ka la sdang ïa ka ‘Operation Lotus’ ha Karnataka. Ki la tyrwa da mar T. 50 klur sha ki MLA jong ngi, nalor ka jingthong pisa kum ka jingkyrshan ïa ki ha ka jingïakhun ïa ka ilekshon shiteng samoi. Hato kane kam dei ka pisa ba la buhrieh?” u la buh jingkylli.
Ha ka jingai jingkren ha ka jingïalang ba ki nongthoh khubor ha ka jaka treikam jong ka seng KPCC, u Siddaramaiah u la pynshisha da kaba ong ba ka seng BJP ka la leh donbor pyrshah ïa ki seng ka liang pyrshah da kaba khmih thuh ïa ki Bank Account jong ki. “Naba sheptieng ïohba ka shahrem ha ka jingïakhun ïa ka ilekshon, ki nongïalam jong ka seng BJP ki la khñiot beiñ ïa ki seng saiñ pyrthei bad kumjuh ïa ka synshar paidbah. Ki la tip ba ki paidbah kin sa ai jingsneng pyrshah ïa ki.
Haduh katno kan lah ban ïalehkai bad ki mat ba ïadei bad ka jingpyndam ïa ka Article 370, CAA, Ram temple, Pulwama. Haba ki la don ki jingbuh jingma ïa ka synshar paidbah, ki briew jong ka ri India kin ym pdiang, hynrei kin ai jingsneng ïa ka seng BJP,” u la ong.
