Kyiv, Lber:
U heh nongialam ka United States ha ka Sngi Balang u la pyntip sha ka Ukraine ba ym lah ban pyntikna ba lano kan poi ka song jingiarap ba $60 Billion sha ka tnat shipai Ukraine namar ia katei ka song jingiarap yn hap ban da ioh jingmynjur lang shwa khamtam na ka Congress. Kane ka khubor ka long hadien ba u President ka Ukraine- u Volodymyr Zelensky u la pan jingiarap na ki ri ka thaiñ Mihngi ba kin phah ia ki tiar thma sha Ukraine hadien ba ka Russia ka la ther bom bad ther ‘namding biang sha Ukraine, ha kaba 5 ngut ki ‘riew paidbah ka Ukraine ki la duh ei ia ka jingim ha katei ka sngi.
Namar la ong ba ka jingïather bom ba markylliang hapdeng ka Ukraine bad Russia ha ka Sngi Balang, ka la wanrah ia ka jingïap jong katto-katne ngut ki ‘riew paidbah kiba shong ha kitei thaiñ ba ka thma ka dang iai bteng.
Namar la ong ruh ba ka tnat shipai jong ka Ukraine kam don bor shuh bad wat ki tiar iakhun thma ruh ki la duna bad lut baroh. Namarkata, utei u nong-ialam ka Ukraine u la khot ia ki ri na thaiñ Mihngi baroh kawei ba kin ïeng biang sa shisien ban ai jingkyrshan ia ka Ukraine ha kane ka sien iakhun thma pyrshah ia ka Russia.
Haba ai jingkren ha ka jingleit jngoh sha Ukraine ha katei ka Sngi Balang, u National Security Advisor ka US u Jake Sullivan, u la ong ba katei ka jingtyrwa jong ka sorkar u Biden ka la shim por slem lypa namar ba kam pat ioh ia ka jingmynjur baroh na ki bor ka aiñ hapoh ka ri United States. Namar kata, ym lah shuh ban tip haduh lano kitei kiba dang sah bad ki bym pat ai ia ka rai halor katei ka mat kin mynjur ne ailad ia ka sorkar US ban phah ia katei ka song jingiarap kaba bun na ka bynta ka tnat shipai ka Ukraine.
Kumta, u la ong ba wat la ka sorkar US kam lah ban pynurlong noh mynta-mynta ia katei ka jingthmu jong ka ban phah ia kitei ki jingiarap sha ka Ukraine hynrei ka dang ialeh katba lah ban rah ia kane ka mat manla ka sngi bad ban ioh ban pynkloi noh katba lah.
