Itanagar, Lber:
U Myntri Rangbah barim jong ka Arunachal Pradesh bad u President ba mynta jong ka Arunachal Pradesh Congress Committee, u Nabam Tuki, u la pynshisha ha ka jingïakren bad ki nongthoh khubor ba un sa ïakhun na Arunachal West Parliamentary konstitwensi kum u kyrtong ka Congress.
Ha kaba ïadei bad ki khubor ba la bna kham hashwa, la ong ba u Tuki u la batai shai ba um pat iehnohkam na ka shuki kum u President jong ka Congress.
Ha ka jaka kane, u la kyntu ïa ka seng bad ai jingmut ïa ki heh nongïalam ba ki la dei ban pyllait ïa u na kane ka kam namar ka jingdonkam ha ka ban leit ïalap na ka bynta ka ilekshon ban wan.
Kumba la tip, la ong ba naba ka Arunachal West Parliamentary konstitwensi ka la ïar da palat 40,000 Square kilometers, u Tuki u la pynpaw ka jingsngewkhia shaphang ka jinglah ban poi sha baroh ki konstitwensi.
Ha ka jingïakren bad ki nongthoh khubor, u Tuki u la ong ba u la sngew burom ïa u Kiren Rijiju, hynrei u la ai jingmut ba la dei ban wanrah ka jingkylla ha ka konstitwensi na ka bynta ban kyntiew bad katkum ka jingdonkam jong ka synshar paidbah.
U Tuki u la kyntu ïa ki nongthep vote ba ki la dei ban jied ïa ka seng Congress lada ki sngew ba ka synshar paidbah ka long kaba dondor.
Ha ka ilekshon kaba la dep, u Tuki u la ïakhun na ki ar tylli ki konstitwensi, ha kaba u la jop ha Sagalee Assembly konstitwensi hynrei u la shahkem noh ha u Kiren Rijiju ha ka Parliamentary konstitwensi.
U Tuki u la long u MLA naduh u snem 1994, ha kaba u la ïoh ban bat da kumba 30 snem ha Sagalee konstitwensi bad u la bat ïa ka kam kum u Myntri Public Works Department bad kum u Myntri Rangbah na ka bynta saw snem ha ki samoi treikam jong u.
