Bhubaneswar, Lber:
Ka Congress kan sa pynbna ïa ki kyrteng jong ki kyrtong ki ban ïakhun ha ka ilekshon hadien ka Holi, la ong u President jong ka Odisha Pradesh Congress Committee u Sarat Pattanayak ha kine ki khyndiat sngi.
U Pattanayak, uba la wanphai na New Delhi hadien ba ka la don ka jingïalang bad ki heh nongïalam jong ka seng, u la pyntip ba ka seng Congress kan sa pynlong ïa ka jingïalap ilekshon kaba heh ha ka jylla shwa ban pynlong ïa ka ilekshon Lok Sabha bad Assembly.
Ha ka jingïakren bad ki nongthoh khubor u President jong ka OPCC u la ong ba ïa ki kyrteng jong ki kyrtong ki ban ïakhun ïa ka ilekshon Lok Sabha bad Assembly la dep ban jied lypa bad ïa kine yn sa pynbna hadien ka jingrakhe ïa ka Holi.
“Ïa ki kyrteng jong ki kyrtong la dep ban jied bad ai ïa ka rai kaba khatduh ha ka jingïalang ba la pynlong jong ka Central Election Committee jong ka seng ha New Delhi dang shen. Nalor kane, kiwei pat ki jingdonkam ha kaba ïadei bad ka seng ka long ban ïakhun pyrshah bad ban pynrem ïa ka seng BJD bad BJP ha ka jylla ha kaba ïa kane la dep ban ïakren ha ka jingïalang,” u la bynrap.
U Pattanayak u la pyntip shuh shuh ba u President jong ka seng Congress u Mallikarjun Kharge, u President barim jong ka seng u Rahul Gandhi bad ka General Secretary jong ka AICC ka Priyanka Gandhi kin sa leit ban jngoh ïa ka jylla ha ka sngi ban pynlong ïa ka jingïalap ilekshon kaba heh.
Nalor kane, ki Myntri Rangbah jong ki katto katne tylli ki jylla ba la synshar ka Congress bad kiwei pat ki heh nongïalam jong ka seng kin sa leit ban jngoh ïa ka jylla ha ka jingpynlong ïa ka jingïalang paidbah, u la bynrap.
