Shillong, Lber 25
U Symbud Myntri Rangbah uba dei ruh u President ka NPP ha Jylla, Bah Prestone Tynsong, u la ong ba ka jingbeiñ kiwei ki seng ïa ka NPP halor ka jingai jingkyrshan ka BJP ha kane ka ilekshon MP kam dei kaei-kaei kaba phylla namar kiwei pat ki seng saiñ pyrthei ruh ki kyrshan ïano-ïano haba kim pynïakhun kyrtong ha ka ilekshon.
U la ai nuksa ba wat ki nongïalam ka TMC ha ki konstitwensi, ka la pynbna ba ki kyrshan ïa ka VPP ha kane ka ilekshon MP na Shillong.
Haba ïakren bad ki nongthoh khubor ha ka Lah Sngi U Blei, u la ong ba naduh 2018, kiwei ki seng ki la kynnoh ïa ka NPP ba ka dei ka BJP da kaba pyntieng laiphew jait ïa ki paidbah ba lada synshar ka NPP kan sa khang ïa ki jaka mane.
Pynban u la ong ba U Blei u la kyrkhu bad ka NPP ka la ïalam ïa ka Sorkar, hynrei kam don satia kano-kano ka jingpyrkhing ne khang ïa ki Ïingmane kumba la shah pyntieng ha ka por ilekshon.
U Bah Prestone u la pynpaw ïa kane haba pynshai halor ka jingshah beiñ ka NPP namar ka jingkyrshan ka BJP ïa ki kyrtong ka NPP na Shillong bad Tura Parliamentary konstitwensi ha kane ka ilekshon sha Ïingdorbar Lok Sabha ha kaba ka jingthep vote kan long ha ka 19 tarik Ïaïong, 2024.
U la ong ba ka NPP ka pdiang sngewbha ïa ka jingkyrshan ka BJP namar khlem poi pyrkhat ba kan kyrshan khamtam eh namar ki la don bun ngut kiba pan tiket ban ïakhun na ka BJP ha baroh ar tylli ki konstitwensi kata ha Shillong bad Tura.
U la ong ruh ban shu kynnoh ba ka NPP ka dei ka BJP bad ka BJP ka dei ka NPP, ka dei ka bym lah ban long namar haba kyrshan lang kam mut ba ka nongrim bad ka riti treikam jong ka seng kan kylla noh.
U Bah Prestone u la kren shaphang ka jinglong ka saiñ pyrthei ha ki Jylla ka Thaiñ Shatei Lam Mihngi ha kaba u la ai nuksa ba ha North East, ka NPP ka donlang ruh bad kiwei pat ki seng saiñ pyrthei kum ha Nagaland ka seng kaba ïalam da u Myntri Rangbah u Neiphiu Rio hynrei kam mut pat ba ka NPP kan weng noh ïa ka riti treikam bad ki mat treikam jong ka seng bad ka jingpyrkhat ïa ki ritpaid, nalor ki riti ki dustur bad jingngeit ba ngi don.
Namar kata, u la ong ban shu kynnoh ba ka BJP ka dei ka NPP bad ka NPP ka dei BJP ka dei kaei-kaei kaba kiwei pat ki thmu ban pynsngewthuh bakla ïa ki paidbah.
Haba pynpaw ba ha kane ka Jylla ka don ka jingkyrshan jong ki seng saiñ pyrthei lada kano ka seng kam buh kyrtong ha ka ilekshon, une u nongïalam ka NPP u la ai nuksa ba wat ka TMC ruh ka pynbna dang shen ha ki konstitwensi ba ka kyrshan ïa ka VPP ha Shillong, hynrei ha Garo Hills, ka TMC ka ïakhun hi ïa ka ilekshon MP. Kumta u la ong ba ka ju long kumne ha ka ilekshon haba kino-kino ki seng saiñ pyrthei kim pynïakhun kyrtong ha ka ilekshon.
