Shillong, Lber 25
Ka Board of Control for Cricket in India (BCCI) ha ka Lah Sngi U Blei ka la pyllait ïa ki prokram ba dangsah jong ka Indian Premier League (IPL) 2024, bad ka Chennai kan pynlong ïa ka jingïakhun final final ha ka 26 tarik u Jymmang.
Baroh ki 74 sien ïakhun jong kane ka lympung yn pynlong hapoh ri India, hadien ba la pynbna ïa ki tarik na ka bynta ka ilekshon Lok Sabha ha kylleng jong ka ri, ha kaba ki jingïakhun kiba kham kongsan kin long ha Ahmedabad bad Chennai. Ïa ka ilekshon Lok Sabha yn pynlong ïa ki hynñiew tylli ki wat ha ka kylleng jong ka ri naduh 19 tarik u Ïaïong haduh 1 tarik u Jylliew.
Ïa ka Qualifier 1 bad ka Eliminator la rai ban pynlong ha Narendra Modi Stadium kaba ha Ahmedabad ha ka 21 bad 22 tarik u Jymmang. Katba ïa ka Qualifier 2 bad ia ka final yn pynlong ha Chepauk kaba ha Chennai ha ka 24 bad 26 tarik u Jymmang.
Ki bor pynïaid ka IPL kin ïai bteng ban pynlong ïa ka jingïalehkai kaba nyngkong bad ka final ha jaka ïalehkai ha la ïing jong ka lahduh jong u snem ba la lah, kata ka Chennai Super Kings.
Kham hashwa ka BCCI ka la pynbna ïa ki tarik tang na ka bynta ki 21 tylli ki jingïalehkai jong ka IPL, kabala dang naduh 22 tarik mynta u bnai.
Ha ka wat kaba ar (second phase), ka Delhi Capitals kan pyndep ïa ki san tylli ki jingïalehkai ha la ïing hakhmat u paidbah nongkyrshan kaba ha Arun Jaitley Stadium ha Delhi, hadien ba ka la jied ban ïalehkai ha ki ar tylli ki jingïalehkai ha la iing ha Visakhapatnam.
Ka Punjab Kings, kaba ju ïalehkai ha PCA New International Cricket Stadium kaba ha Mullanpur, kan pynlong noh ia ka jingïalehkai ha la ïing ha Dharamsala.
Ka PBKS kan pynkhreh ïa ki jingïalehkai ha la iing ha ka 5 bad 9 tarik u Jymmang pyrshah ïa ka Chennai Super Kings bad ka Royal Challengers Bengaluru.
Ka Rajasthan Royals ka la jied na ka bynta ka jingïalehkai kaba ar ha Guwahati bad kan ïalehkai khatduh na ka bynta ki jingïalehkai ha la ïing kaba ha Assam.
Kane ka kynhun kan ïalehkai pyrshah ïa ka Punjab Kings ha ka 15 tarik u Jymmang bad hadien kan ïakhun pyrshah ïa ka Kolkata Knight Riders ha ka 19 tarik u Jymmang, ka ban long kaba khatduh jong ka league stage na ka bynta kane ka lympung ïalehkai IPL.
