New Delhi, Lber:
Ki nongbud jong ka seng AAP ha ka Sngi U Blei ki la pynlong ïa ka jingïakhih ha kawei ka jingkieng ïaid kjat jong ka ITO ban pyrshah halor ka jingshahkem jong u nongïalam jong ki, u Arvind Kejriwal. Hadien kane la bud da ka jingthang mombati ha ka por janmiet ha kiba bun ki bynta jong ka nongbah.
Ki nongbud jong ka seng ki la pyrta da ki kyntien kiba pyrshah ïa ka seng BJP, kaba la bat ïa ka jingsynshar ha ka sorkar kmie, bad kaba la tehlakam ïa ka kynhun Enforcement Directorate kaba la kem ïa u Myntri Rangbah jong ka Delhi ha ka sngi Palei.
Ka lama ba la wah da ki nongïakhih kaba don ïa ka jingthoh kaba ong “Main Bhi Kejriwal” na ka jingkieng, ka la shah weng noh ha ki pulit jong ka Delhi.
“Kaei kaba u Kejriwal u la leh na ka bynta ki paidbah bad khamtam na ka bynta ki longkmie jong ka Dehli, ym don mano mano kiwei pat kiba lah ban leh. Ngin sa ïai bteng ban pynlong ïa ka jingïakhih katba u Myntri Rangbah jong ngi um pat shah pyllait,” la ong uwei na ki nongïakhih jong ka seng AAP.
Sa uwei pat u nongïakhih, u la ong ba ka jingshahkem jong u Kejriwal ka la long hashwa ka ilekshon ha kaba kane ka la pynmih shibun ki jingkylli ha kaba ka seng BJP ka la donkam ban jubab.
Ha ka por janmiet jong katei ka sngi, ka Myntri ka tnat pla tyngka jong ka jylla ka Atishi ka la ïasnohktilang ha ka jingthang mombati ha ka thaiñ Govindpuri jong ka South Delhi.
Kaba kum kane kajuh ka jingïaid paidbah ka la long ha kiba bun ki bynta jong ka nongbah.
“Kane ka dei ka sien kaba nyngkong ba hadien ba la pynbna ïa ki tarik ban pynlong ïa ka ilekshon, u nongïalam jong ka seng AAP u la shahkem, bad ïa ki Bank Account jong ka seng Congress la pynsangeh treikam,” la ong ka Atishi.
U Myntri jong ka tnat PWD u la pynshisha da kaba ong ba u Myntri Rangbahduh u Modi u la pynïap ïa ka synshar paidbah ha ka ri.
