Jowai, Lber 25
Ka Synjuk Waheh Shnong Ri Jaiñtia ha ka Annual General Meeting ka la jied biang ïa u Bah Arminius Lipon Waheh Shnong Pynthorlangtein kum u President na ka bynta ka samoi treikam jong u snem 2024-2027.
Ïa kane ka Annual General Meeting la pynlong ha shnong Ïalong, West Jaiñtia Hills District ha ka 25 tarik Lber ha ka jingdonlang ki Waheh Shnong bad Life Member na ki ar tylli District ka Rilum Jaiñtia.
Nalor u President la jied ruh ïa u Kampher Pohlong Waheh Shnong Amlarem kum u General Secretary, Tellme Phawa Waheh Shnong Sabahmuswang kum u Finance Secretary bad u Damon Dkhar Waheh Shnong Modop Nartiang kum Publicity Secretary.
La jied ruh ïa ki Life Member jong ka synjuk ba kynthup ïa u Bah Bishar Shylla Treasurer, Selsing Langi bad Nidamon Shullet kum ki Internal Adviser jong ka synjuk.
Ïa ka kam Vice President la bat da ki President na ki Block Unit ba kynthup u Firmly Rymbai Khliehriat Block Unit, Damian War Namdong Block Unit, Ebormi Pale Thadlaskeiñ Block Unit, Twinson Rymbui Amlarem Block Unit, Niawbait Ymbon Laskeiñ Block Unit bad Hame Rilang Saipung Block Unit.
Ki Joint Secretary ki kynthup ïa u Benedict Buam Amlarem Block Unit, Wilbert Nongtdu Khliehriat Block Unit, Arsuk Tyngkra Thadlaskeiñ Block Unit, Matheus Dkhar Saipung Block Unit, Malbi Timung Namdong Block Unit bad Risneilang Langstang Laskeiñ Block Unit.
Nalor kine la jied ruh ïa sawphew ngut ki dkhot Executive Committee jong ka synjuk na baroh artylli ki District.
Ha kane ka sngi la ïoh ruh ban pynsngew ïa ka kaiphod jingkheiñ-jingdiah ne Audit Report jong u snem 2021-2023. La pynsngew ruh ïa ki matti treikam jong ka synjuk ha ka jingïaid lynti ha kine lai snem kiba la leit noh.
U Bah Arminius Lipon ha ka jingkren u la kyntu ïa ki Waheh Shnong, Life Member bad dkhot ban long kiba trei shitom, kiba sngewrit bad ïaishah bad ruh ban don ka jingïatylli khnang ban lah ban wanrah ïa ka jingtrei hok jingtrei khuid ha ka kam synshar shnong synshar thaw bad ha ki kam imlang sahlang.
Namar kata, u kyrmen ba kane ka Executive Committee kaba thymmai kan lah ruh ban pynïatylli ïa ki paradoh parasnam bad ban pynim pynneh-pynsah ïa ki dong ki shnong khamtam ha ki jaka khappud bad kiwei.
