Shillong, Lber 25
Ka Pomshutia CC bad ka Cricket Smit CC ki la ïoh jingjop ha ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association ha ka Lah Sngi U Blei.
Ha kane ka jingïakhun kaba la long ha Shortimai Syiem Stadium kaba ha Smit, ka Cricket Smit ka la lah ban pynliem noh ïa ka Mawphlang CC da 3 wiket. Ka Mawphlang kaba la kam trai ban tied nyngkong, ka la kamai 107 run bad shah pynhap 6 wiket ha ki 20 over. U Pynshongdor u la tied 28 run na ki 42 bol. Katba u Elbrenroy Mawthoh u la shim 1 wiket na ka bynta ka Smit.
Haba wan shimti ïa ka pali kaba ar, ka Cricket Smit ka la kynjoh sha ka thong da kaba kamai 108 run bad shah pynhap 7 wiket ha ki 16.3 over. U Pynkhrawbok Thabah u la tied 25 run na ki 25 bol. Katba u Mawlynnai Wahlang u la shim 3 wiket na ka bynta ka Mawphlang . Ïa ka nam Player of the Match la khur da u Pynkhrawbok Thabah.
Haba phai sha ka jingïakhun kaba ar, ka Pomshutia ka la jop da 4 wiket ïa ka Mawryngkneng CC. Ka Pomshutia kaba la jop ïa ka kynting pisa, ka la ailad shwa ïa ka Mawryngkneng ba kan tied nyngkong ha kaba ka la kamai 76 run bad shah pynhap 10 wiket ha ki 15.3 over. U Pyntngenlang Kharsahnoh u la tied 19 run na ki 29 bol. Katba u Aristerwell Suting bad u Shembhalang Pyngrope ki la shim mar 3 wiket na ka bynta ka Pomshutia.
Haba wan shimti ïa ka pali kaba ar, ka Pomshutia ka la lah ban kynjoh sha ka thong ha kaba ka la kamai 81 run bad shah pynhap 6 wiket ha ki 17.5 over. U Shemphang Tymsen u la tied 19 run na ki 40 bol. Katba u Guiding Star Kharsati u la shim 3 wiket na ka bynta ka Mawryngkneng. Ïa ka nam Player of the Match la khur da u Aristerwell Suting.
