Shillong, Lber 25
Ka lympung ïalehkai Inter Office Shillong League 2024 ba la pynïaid da ka Shillong Cricket Association ka la nangjam shaphrang ha kaba ka Power Grid ka la khur ïa ka jingjop, katba ka Police Headquarters bad ka Raj Bhawan ki la poi sha ka jingïakhaid.
Ha kane ka jingïakhun kaba la long ha madan Urkaliar, ka Power Grid ka la pynliem noh ïa ka Meghalaya Teachers da 6 wiket. Ka Meghalaya Teachers kaba la kam trai ban tied nyngkong, ka la ïoh 205 run bad shah pynhap 8 wiket ha ki 20 over. U Sanvert B. Kurkalang u la ïalehkai bha da kaba ïoh 100 run na ki 52 bol bad u Bonney u la ïoh 31 run na ki 18 bol. Katba u Kunwardhrub bad u Babul Doley ki la shim mar 2 wiket.
Haba wan shimti ïa ka pali kaba ar, ka Power Grid ka la lah ban kynjoh sha ka thong da kaba ïoh 208 run bad shah pynhap 4 wiket na ki 15.5 over. U Utpal Das u la tied 94 run na ki 44 bol bad u Rahul Paul u la ïoh 56 run na ki 24 bol. Katba u Sanvert Kurkalang bad u Mackie Blah ki la shim mar shi wiket. Ïa ka nam Player of the Match la khur da u Utpal Das.
Haba phai sha kawei pat ka jingïakhun, ka Police Headquarters kaba la kam trai ban tied nyngkong ka la kamai 147 run bad shah pynhap 4 wiket na ki 20 over. U Selbin K. Sangma u la tied 34 run na ki 17 bol bad u Bekash Gurung u la ïoh 33 run na ki 31 bol. Katba u Rakesh Thakur u la shim 2 wiket bad ïa ka shi wiket la khur da Wanjo Mawroh (Player of the Match).
Haba wan beh ïa ka thong ka Raj bhawan ka la ïakhaid da kaba ïoh 147 run bad shah pynhap 9 wiket na ki 20 over. U Vicky Balmiki u la tied 41 run na ki 31 bol bad u Wanjo u la ïoh 38 run na ki 22 bol. Katba u Zakir bad u Amandal ki la shim mar 2 wiket.
