Shillong, Lber 25
U General Secretary ka United Democratic Party (UDP), Dr. Jemino Mawthoh ha ka Lah Sngi U Blei u la ong ba ka jingkylla ha ka jinglong-jingman ka saiñ pyrthei hapoh ka Jylla ha kine ki khyndiat sngi ba la dep kan long ka jingmyntoi ïa ka Regional Democratic Alliance (RDA) ha ka ilekshon ban wan sha ka Lok Sabha.
Ka BJP ha ka Sngi Thohdieng ka la pynbna ban ym pynïeng kyrtong ha ka ilekshon MP Lok Sabha na Shillong bad Tura Parliamentary konstitwensi, bad kan kyrshan ïa ki kyrtong ka National People’s Party (NPP) na baroh artylli ki konstitwensi.
Haba kren halor katei ka bynta, u Dr. Mawthoh u la ong, “Ngin ong kumno, kane ka shai kdar ba ka UDP ka don la ka jong ka nongrim. Hooid, ha ka saiñ pyrthei ki ong ba haba donlang hapoh ka Sorkar, ki ïa long lang kumjuh, hynrei hap ban sngewthuh ba ka seng ka don la ki jong ki nongrim bad ki rukom pyrkhat.”
U la ong, “Hangne ka paw shai ba ka NPP bad ka BJP ki ïadonlang. Ngi te ngim don ïa kajuh ka rukom pyrkhat. Ngi don la ki jong ki nongrim.”
Haba kdew ba ki ju mih ki jingkynnoh ba har rukom pyrshah ïa ka UDP naba ka don lang hapoh ka Sorkar, u General Secretary u la pynshai ba ka seng kam ïadon bynta eiei bad ka BJP.
“Ngi hap ban sngewthuh ïa ka jinglong-jingman jong ka saiñ pyrthei. Lada ngi don bun ngut ki nongmihkhmat, ngi lah ban ïalam ïa ka Sorkar ne ïasnohlang badno-badno, hynrei hangne ka jingsynrop ka long na bynta ka jingskhem jong ka Sorkar,” u la ong.
Halor ka jingpyrshang hashuwa, hadien jong ka ilekshon sha ka ïingdorbar thawaiñ ka Jylla ban thaw noh da kawei ka Sorkar kaba khlem ka NPP, u la buh jingkylli ba ha kano ka rukom yn ïaid shakhmat bad kane naba ka jingbun paid ha ka liang ki nongmihkhmat ruh kam biang.
Haba kylli, u la pynsngew ba haba phai sha ka ilekshon MP, ka long kaba eh ban ong mano ba kham khlaiñ.
“Ka Congress ka la synshar la 15 snem, hynrei mynta, ka la tlot la ka long ha ka ri ne hangne. Ka NPP ka don la ki jong ki nongkyrshan, hynrei haba phai sha ka jingïoh ‘vote’ jong ka UDP bad HSPDP ha kane ka ilekshon ba la dep, ka la kiew bad ka pynpaw ïa ka jingkhlaiñ jong ka RDA bad kumta ka don bha ka jingkyrmen ha kane ka kynti. Mynta, kane ka seng kaba mih thymmai ruh ka ïaid hi, hynrei ban ai ka jingkheiñ kaba tikna ba katno ‘vote’ kan ïoh, kane ka dei ka jingkylli kaba hap ban buh namar ka dang dei ka seng thymmai,” u la ong.
Ha kawei ka liang, u Dr. Mawthoh u la kdew ba ka jingbym pynïeng kyrtong ka BJP ha kane ka ilekshon ban wan ka la pynsngewsih shi kat dei ïa ki nongtrei bad nongkitkam ka seng.
“Mynta ki nongkyrshan ka seng (BJP) kim tip shano ban leit, kumta ka long kaba eh bha ïa ki. Hynrei jong ka UDP, ki neh kumjuh bad ngi don ka jingkyrmen bad kumta ka long ka jingmyntoi,” u la ong.
Shuh shuh u la bynrap, “Kane ka jinglong-jingman ha ka saiñ pyrthei kan long ka jingmyntoi ïa ngi (RDA) namar ka ‘vote’ kan pait kan pra. Ki nongkitkam ka BJP ki sngewdiaw naba ka seng kam pynïeng kyrtong. Ha kajuh ka por, ka pynpaw ba ngim don bynta eiei bad ka BJP.”
Na ka liang utei u nongïalam u la pyntikna ruh ba ka jingmih noh jong ki nongïalam ka seng na Ri-Bhoi distrik ba kynthup ïa u Bah Donbok Khymdeit kan ym ktah satia ïa ka UDP ha kane ka ilekshon ban wan.
