Shillong, Lber 25
U Working President ka NPP Meghalaya, Bah Wailadmiki Shylla uba dei u MLA ka Jowai, u la ong ba ka Congress ka la nang hiar nang hiar bad ba kan nym lah satia ban ïakhun ne pynliem ïa ka sorkar NDA.
“Wat la ki la thaw da kata ka INDIA Block hapdeng ki seng saiñ pyrthei bapher-bapher ban ïakhun pyrshah ïa ka NDA, hynrei kin nym lah ban pynliem ne poi shaei-shaei ruh, naba kim don satia ka jingïatylli ne long kawei,” la ong u Bah Wailad haba ai jingkren ha ka jingïalang pdiang ïa ki nongïalam bad nongkyrshan Congress sha ka sem NPP ha Nongkseh ha ka Lah Sngi U Blei.
Une u nongïalam ka NPP u la ong ba ka juk ka la ïaid bad don mynta ha ka juk digital, hynrei ka Congress pat ka dang ïaid ha ka juk kum kito ki Kodak Camera ba shon da ki reel. Ka Congress ka la long thik kum ka camera Kodak, naba ki nongïalam kim kwah ban kylla (change) ha ka seng, ki kwah long beit kumjuh.
“Ki briew mynta ki la phai sha ki ‘digital’ namar ka juk ka la ïaid bad ym don shuh ki ban pyndonkam da ki Kodak Camera hynrei ngi ïohi ba ka Congress pat ka kwah ban neh beit kumto. Lada ngi kwah ban kiew ngi hap ban kylla bad ïaid katkum ka por,” u la ong.
“Phi peit ha ka INDIA Block, bun ki seng saiñ pyrthei ki la ïatreilang bad pynbeit ruh ban don ka jingbhah konstitwensi ban ïoh ka jingjop, ha Meghalaya ruh ki la don jingïakren ban ïakyrshan kylliang. Hynrei katkum ki khubor, ka Congress ka pynïeng kyrtong baroh ar konstitwensi, ka TMC ruh pynïeng na Tura bad kane ka pyni ka jingïapait jingïapra jong ka INDIA Block, kaba mut ba kin nym lah ban pynkhyllem ïa ka NDA. Kumta lada pynjop biang ïa u kyrtong Congress, ka long kum ban shu ai bor ban leit shong ben, namar un nym lah ban leh eiei naba kin nym sngap satia,” la ong une u nongïalam ka NPP.
Shuh shuh u la ong, “Ka NPP ka shah beiñ shah kynnoh man la ka snem, bad katba ki briew ki dang bunkam ban kynnoh ïa ngi, ngi pat dang bunkam ban pdiang ïa ki nongïalam bad nongkyrshan na kiwei pat ki seng saiñ pyrthei bad nga tharai lada ym ïohi ïa ki kam ka sorkar yn nym don ba kwah ban ïatreilang bad ka NPP.”
U Bah Wailad u la ong, “Ha u snem 2013 ka NPP ka jop tang 2 ngut ki MLA, ha u 2019 ka jop 18 ngut bad ha u 2023 ka la jop 26 ngut bad da ka jingpynïasoh u MLA ka Mawkynrew bad Sohra, mynta ngi la don 28 ngut ki MLA, kumta ha u snem 2028 ngam artatien ba da ka jingdon ïa ki 2 ngut ki MP ha Delhi, ngin sa ïoh ban synshar marwei hapoh Meghalaya.”
