U Nongsaiñ Hima, 1969
Ngi don hapdeng ka Lyiur bad ka Lyiur ka mut ka por ba slap bha, ba tap lyoh ka khyndew ka mariang, kyrhuh u pyrthat, thaba ka lielieh, byrthen ki kshaid bad byrngem ki wah, lyngkien sak ka Surma, bad ngam ka Brahma.
Hynrei khlem ka Lyiur ruh kan nym wan ka Synrai – ka por ba ngi ot ïa u symbai uba ngi la thung bad pynsan ha ka Lyiur. Ka Rep ka Riang ka shong shibun ha ka Lyiur. Lada ka jingwan ka Lyiur ka slem ka ktah ïa ka thung ka rep bad u symbai u lah ban sep ei. Lada ka wan kloi ruh ym long namar kane hi ruh ka ktah ïa u symbai. La ong ba ka Rep ka Riang ha kane ka ri jong ngi ka long ka jingïakhalai bad u slap.Ka Jingkhalai la sngewthuh ka long kaei kaei ka bym thikna kaba lah ban ioh bad kaba lah ban duh. Kumta khnang ba ka rep ka riang ha ka ri jong ngi kan long kaba sep spah la dei ban pyrkhat kumno ban leh bad phikir ïa kane ka jingpynbiang ïa ka um. Ka long ka bym lah bad palat ïa ka bor jong ngi ban pynpoi bad pynhap biang por ïa u slap namar ka shong shibun ha ka jingwan ka lyer na ki duriaw kiba wanrah ïa ki lyoh ba don um kiba wan beh sha kine ki thaiñ. Kane ka lyer bad u lyoh uba wanrah slap kim lah ban jam ïa kine ki lum jong ngi ne ki lum Himalaya bad kumta ka phai dien ban hap kum u slap.
Don ki ri kiba la ïaid shaphrang kiba la pyrshang kumno ban pynbiang por ia ka jinghap u slap. La ong ba ha ri Italy ha kito ki kper soh wain kiba ïar bad kiba sei soh, ka jinghap u slap biang por ka long kaba donkam eh. Lada u slap u hap ha ka por ba la ih u soh grape (sohwain) u slap u rah noh ia ka jingthiang u soh. La ïathuh ba ha kita ki jaka lada ki iohi ïa ki lyoh wanrah slap, ki sait noh da ka tup ban pynpra ïa u lyoh khnang ba u slap un hap noh sha kiwei ki jaka. Don ki jaka ha kiwei pat ki ri kiba thung ïa ki dieng kiba lah ban shim noh ïa ka jingsngem na ka khyndew lada jur slap bad don ki jaka kiba ki lum ïa ka um slap ha ki den um ban pyndonkam ïa ka ynda haba la dei ka por.
Ha ka ri jong ngi, ngi shu ap ha ka jingisynei ka jingwan biang por u slap, ngim pat don ki lad bad ym pat don shym don ban pyrkhat ban pynlait na kane ka jingïakhalai bad u slap. Kumta haba slap hangne haki ri lum jong ngi ym tang ba lyngkien sak ka Surma bad ka Brahma hynrei ka jingjulor ka khyndew ka long kaba jur namar la rah noh ia ka sboh baroh, khamtam haba syllen ka lum ka wah.
Kumta ka Lyiur ka long ka por kaba rit mynsiem hynrei ruh ka long ka por kaba donkam shibun na ka bynta ka rep ka riang lada la lah ban pyniaidi bha ïa ka um slap kaba hap ha kane ka por. Ka por slap ruh ka pynkhuid ïa ka shnong ka thaw bad ka bsa um dih ïa ki briew bad khamtam hangne ha sor ka Lyiur ka trei ïa kam Municipal ha kaba pynkhuid ïa ki jakhlia ba la theh ha ki nala bad sar ia ki surok ki bym ju sar shuh da kito kiba dei ban sar.
