Shillong, Lber 25
Ka KHNAM ka la kyntu ïa ka Sorkar bad ki bor pulit ban tem ïa kino-kino ki jingjia ha ki jaka pule kiba lah ban wan jingkulmar.
“Ki jingjia ha kine ki sngi ha NEHU naduh ka jingwan ki briew tap dur hapoh phyllaw ka NEHU ban thwet ïa ki samla pule Khasi bad ka jingwan jong ki briew ba nabar shapoh ban shah lehkmen puja bret abir ki dei ki dak ki shin ïa kiba ka Sorkar bad ki bor pulit kin hap ban tem ïoh ka pur,” la ong u Working President ka KHNAM, Bah Thomas Passah ha ka kyrwoh khubor.
Na ka liang ka seng ka pynpaw ba ka don ka jingpyrshang ban pynshit bad wanrah jingkulmar na ka liang ki briew/seng ki bym dei na ka Jylla.
“Lada ki pulit kim kem bad pynshitom ïa kine ki briew kiba leit ban rung jubor shapoh ka jaka pule ban pynshongshit bad pynkulmar, kan pynpaw ïa ka jingtlot jong ka aiñ namar ngi la ju ïohi ba lada dei ïa ki sengbhalang trai-ri, tang hapoh shi sngi la shah thwet, la shah kem bad shah pynngat mukotduma ki dkhot ki seng,” la ong u Bah Passah.
U la bynrap ba na ka bynta ka shongsuk shong shngaiñ, ka Sorkar ka dei ban leh ïa kaba donkam mardor khlem pynslem.
