Shillong, Lber 25
U President ka Voice of the People Party (VPP), Bah Ardent M. Basaïawmoit ha ka Lah Sngi U Blei u la pynshai ba ka TMC kam shym la kyrshan satia ïa ka VPP kumba la kynnoh.
“Hana ki ong ba ka TMC ruh ka kyrshan ïa ka VPP, hangno kata ka TMC ka ong ban kyrshan ïa ngi, hangno kata ka Mamata ka ong ban kyrshan ïa ngi,” la ong u Bah Basaïawmoit ha ka jingïalang ha Tyrsad.
U la ong ruh, “Ki thok im-im peit-peit, tangba thok ruh kim nang…thok ïa kaba u khyllung khynnah ruh um ngeit, hangno u briew un ngeit ban ong ba kata ka TMC kan kyrshan ïa ngi.”
Shuh shuh u la ban biang ba ka TMC ka khlem kyrshan ïa ka VPP bad kumba ka long mynta, ha Nongthymmai ki paidbah ki ïakren ba ki nongïalam TMC ki la don ka jingïakynduh lang ban kyrshan ïa ka NPP. “Mynta baroh ki ïa ïeng lang ban ïakhun pyrshah ïa ka VPP,” u la ong.
