Port Moresby, Lber:
Kumba 5 ngut ki la khlad noh bad palat 1,000 tylli ki iing briew ki la julor ha u jumai bah uba la pynkhynñiuh ia ka Papua New Guinea ha ka Sngi U Blei. Utei u jumai u dei uba la kot kumba 6.9 Magnitude ka jingkhlaiñ bad kumta la ong ba u la pynkhynñiuh ia katei ka nongbah baroh kawei bad kumjuh ruh ia ki thaiñ ba marjan jong katei ka nongbah ha katei ka step.
Katkum ki kaiphod ba la ioh lum tad haduh jong ka step Lah Sngi U Blei, la shem ba palat 1,000 tylli ki iing briew ki la julor bad shah ktah na utei u jumai bah ha katei ka step bad ki bor pyniaid ka Papua ki dang ialeh ban bud dien bad wad bniah bha halor ki jing julor bad jingshah ktah ha utei u jumai ha kylleng sawdong jong katei ka bynta.
Kumta, la ong ba bun tylli ki shnong kiba don hajan bad harud ka wah ‘Sepik’ ki la mad ia ka jingshlei um kaba jur tang mar ia khie utei u jumai uba khlaiñ ha ka step Sngi U Blei.
Haba iadei bad kane, u heh pulit jong katei ka nongbah, u Christopher Tamari haba iakren bad ki lad pathai khubor u la pyntip ba tad haduh ba la ioh ban pyllait paidbah ia kane ka khubor, ki don 5 ngut kiba la tikna iap ha katei ka jingjia, hynrei ka jingdon kiba shah ktah bad kiba mynsaw ka lah ban bun.
Katkum ki dur ba la saphriang paidbah, la iohi ia ki iing-dieng bad ki iing-briew kiba la julor bad tuid sha kitei ki jaka ba lang um bad shlei um ha kitei ki thaiñ ba marjan bad ka wah.
Wat la katta, la ong ba ka jingkhynñiuh jumai ka long kaba khah-khah hapoh Papua New Guinea, kaba long ka nongbah kaba shong hajrong jong ka khyndew khluit ‘Ring of Fire’.
La ong ba ki don kumba 9 Million ki paid nongshong shnong jong katei ka ri dew lynnong kiba im shabar jong ki shnong bad ki nongbah jong katei ka ri, ha kaba kan shem jingeh shibun ia ki tnat iarap ba kin leit iarap ne leit jngoh namar ka jing bym biang ki lynti-syngkien bad ki surok ban iaid kali.
