New Delhi, Lber:
Ki nongbud jong ka seng Congress ha Uttar Pradesh ki la tikna ha kaba ki la ong ba u lah ban dei u President barim jong ka seng u Rahul Gandhi ne ka General Secretary ka Priyanka Gandhi Vadra ban sa ïakhun ha ka ilekshon Lok Sabha na Amethi ne Raebareli, la ïathuh u heh nongïalam jong ka seng ha katei jylla u Ajay Rai ha ka Sngi U Blei.
Kane ka jingkren jong u Rai ka la long shi sngi hadien ba ka seng Congress ka la pyllait ïa ka thup kryteng jong 9 ngut ki kyrtong na Uttar Pradesh, khlem da pynmih ïa ki kyrteng jong ki kyrtong na ka bynta ka Amethi ne Raebareli konstitwensi, ïa kiba la shah ñiew ba ki dei ki konstitwensi ba la bat da ka longïing jong ki Nehru bad ki Gandhi.
U Rai, uba la ïoh ïa ka tiket na Varanasi ban ïakhun pyrshah ïa u Myntri Rangbahduh u Narendra Modi, u la ïathuh ha ki lad phah khubor ba ki nongbud jong ka seng Congress ki la ïai pynbor ïa ki nongïalam jong ka seng ba kin pynïakhun ïa u Rahul Gandhi na Amethi bad ïa ka Priyanka Gandhi na Raebareli.
“Wat lada ngi la don ka jingsngew tikna, na ka bynta kawei ka konstitwensi la tikna ba iwei napdeng kine ar ngut kin sa ïakhun ïa ka ilekshon ha kawei na kine ar tylli ki konstitwensi,” la ong u Rai.
U President jong ka seng Congress ha UP u la ong ba ka la don ka jingthrang jong ki nongïalam bad ki nongbud jong ka seng ba u Rahul Gandhi bad ka Priyanka Gandhi ki dei ban ïakhun na ka bynta ka ilekshon na Amethi bad Raebareli.
Ha kaba ïadei bad kane, ïa ka rai kaba khatduh, yn sa ai da ki heh nongïalam jong ka seng, u la bynrap.
