Ka rai jong ka Bharatiya Janata Party (BJP) na New Delhi ban ym pynïeng kyrtong ha ka ilekshon MP Lok Sabha na Shillong bad Tura Parliamentary Constituency ka khlem lah ban pynkmen ïa baroh ki nongkyrshan jong ka seng. Ka long ka jingshisha ba ki nongkyrshan ba radbah ka BJP ki dang ap khmih lynti ïa ki kyrteng jong ki kyrtong, phewse kata ka jingap ka long lehnohei. Ki nongïalam na Delhi ki la hukum ïa ki nongïalam ka BJP ha Meghalaya ba ki dei ban kyrshan ïa ki kyrtong ka seng National People’s Party (NPP) na Shillong bad Tura wat la ki sngewthuh ba kane kan ktah ïa ka jingsngew jong kiba bun bah ki nongkyrshan ka BJP bad jong u Narendra Modi. Ngi kynmaw ba ha u snem 2014 ha ka ilekshon MP, u kyrtong ka BJP, u Bah Shibun Lyngdoh, u la ïoh jan 1 lak ka ‘vote’ na Shillong Parliamentary Constituency wat la u dang dei u ‘riew thymmai ha ka saiñ hima-sima ha kato ka por. Kiba bun ki la kyndit kumno u Bah Shibun u bym pat don ba ithuh bha ha kiba bun ki jaka u la ïoh haduh katto ka ‘vote’. Hynrei ha u snem 2019, ha ka por ba ïakhun u Bah Sanbor Shullai, ka ‘vote’ jong ka BJP ka la hiar arsut. Mynta pat, ka BJP ka la pynpaw ban kyrshan ïa ka NPP ha Meghalaya, bad ka la pynlehnohei ïa ka jingtrei shitom jong ki nongtrei bad nongkyrshan ban pynïar ïa ka seng ha kane ka jylla.
Kane ka jingkyrshan jong ka BJP ïa ka NPP ka la pynkhie im biang ïa ka jingïatai ba ka NPP ka dei tang ka ‘Team B’ jong ka BJP, bad kata ka jingleh mynleh ba ki ïa jngai iwei na iwei, ka dei tang ka kam shukor ïa ki paidbah. Mynta ka NPP ka la bunkam ban ïada ïalade na kane ka jingshah kynnoh. Ka hap ban pynshai bad sait khuid biang naduh ba sdang. Baroh shi katta, ka NPP ka ju ong ba kam dei kata ka ‘Team B’ jong ka BJP namar ka don la ka jong ka nongrim bad ka saiñpyrkhat kaba ïapher na ka BJP. Ki seng saiñpyrthei kiba ïakhun pyrshah ïa ka NPP mynta ki ïoh lad ban takraiñ ïa kane ka seng namar ka jingkyrshan jong ka BJP. Ngi dei ban kynmaw ruh ba ka NPP ka khlem kyntait ïa kane ka jingai jingkyrshan ka BJP, bad ka la pdiang sngewbha. Namarkata, ka la buh jingeh ïa ki nongïalam bad ki nongkyrshan ka NPP ban ïada na ka jingshah kynthoh ba ka dei tang ka dur bula jong ka BJP.
Tangba kawei pat ka jingshisha kaba paw na kane ka jingkyrshan ka BJP ïa ka NPP ka long ba ki seng heh (National Party), ki lah ban don ka jingïasngewthuh jingmut bad ka jingïatreilang. Hynrei kane pat kam don ha ki seng ki barit khamtam ki seng ‘riewlum. Ki la ïa lapmiet pynban ha ka jingkynthoh markylliang. Lada kat ka BJP, kaba kob ban jop palat 400 ngut ki MP, ka dang lah ban ïatreilang bad ka NPP, kaba long ka seng kaba kham hapoh jong ka, kan eh aïu ïa ki seng ki barit ba kin ïasnohkti lang? Ngi ïohi bha ïa kane ha Meghalaya. Hooid, ka United Democratic Party (UDP) bad ka Hill State People’s Democratic Party (HSPDP) ki ïatreilang hapoh ka lama jong ka Regional Democratic Alliance (RDA). Tangba kam pat biang tang katne. Donkam ban ïatreilang lut baroh khnang ban kham tylli ka ‘vote’. Hynrei kata ka shong ha ka jingstad jong ki nongïalam jong ki seng ‘riewlum ki ïa pyrkhat kumno wat la ki sngewthuh ba katba nang ïa pait ka ‘vote’ jong ki briew ki bym kwah ïa ki seng heh, katta ka nang suk ïa ki seng heh ban jop. Namarkata, ki ju ong ba katba dang ïakhun ki para trai ri, nang thap kti uba shong shabar na ka daw ba u sngewthuh ba kan wanrah jingïohnong ïa u hi.
Imat kan dang shimpor ïa kine ki seng rit ba kin sngewthuh ïa ka rukom treikam ka saiñ hima-sima bad kumno ban ïakhun pyrshah ïa ki seng heh. Lehse don ki seng rit kiba pyrshang ban pynpait khnang ïa ka ‘vote’ na ka bynta ka jingmyntoi jong ki seng heh. Ki seng heh ki pyndonkam da kine ki seng rit ban pharia ïa ki nongshong shnong khnang ba kin ïoh jingmyntoi ïalade. Tangba kat haduh ba ki seng rit kin sngewthuh ïa kata, ka ilekshon ka la poi sha kaba kut, bad hadien kata, hap ban pynlut por ha ka jingbabe. Ha kane ka jylla kaba don tang 22 lak tam ki nongthep ‘vote’, ka dang suk palat ban pharia ïa ki paidbah. Lada lah ban pharia tang ïa kumba 2 lak ruh, ka jingjop kan leit sha ki bym poi pyrkhat, bad kito kiba don jingkyrmen ban jop, ki sah ha ka lyngngoh.
Namarkata, ka bor ka shong ha ki paidbah la kin ailad ba kin shah pharia ne kin tur sha ka jingïatylli. Ka shong ha ki paidbah ba kin pyni ba wat la ki seng rit kin ym lah ban ïatylli, hynrei ma ki pat ki lah. Lada mih ka jubab jong ka jingïatylli na ki paidbah, kata hi kan long ka khubor ka ban pynkyndit bynriew ïa ki seng rit, bad lehse ha kata ka por, kin sa shim ïa ki sienjam ban weng ïa ki diengpyngkiang kiba khanglad ïa ki ban ïalong kawei bad ban poi lang ha kajuh ka jingmut. Ka por kan sa batai shai namar ka saiñpyrthei ka dei kaba kylla hapoh shi khyllipmat. Ngi kyntu ïa ki paidbah ba kim dei ban pynlehnohei ïa ka hok bad ka kamram ban jied ïa la ki jong ki nongthaw aiñ, bad ha ka 19 tarik Ïaïong ki dei ban leit sha ki “Polling Station” ki jong ki bad ban leh ïa kaba donkam.
