Shillong, Lber 25
U Symbud Myntri Rangbah ka jylla uba dei ruh u President ka National People’s Party (NPP), Bah Prestone Tynsong, u la ong ïa u nongïalam ka Voice of People Party (VPP) ba un pynshisha ba u bamsap bad lada u lah, un hiar shuki bad iehnoh kum u MLA.
U Bah Prestone u kob ïa u Bah Ardent halor ka nongrim ba u nongïalam ka VPP u la lapmiet ban kynnoh bamsap ïa ka Sorkar bad ïa ka NPP kat ha man ki jaka ba u leit ai jingkren.
U Bah Prestone u la ong ba ki jingkynnoh pyrshah ïa ka NPP khamtam ka VPP ki long tang ban pynthohbria.
“Lada ka jingkynnoh jong ka VPP ba ka NPP ka dei kaba bamsap nga kloi ban hiar shuki kum u Symbud Myntri bad ban iehnoh syndon wat ïa ka kam kum u MLA lada u Bah Ardent u lah ban pynshisha ba u Bah Prestone u dei u briew uba bamsap,” la kob u Bah Prestone.
U la ong ba lada ki lap ba don ka bamsap, wat shu kynnoh hynrei leit sha ka aiñ namar ki don ki tnat treikam ba tohkit ïa ki jingkynnoh bamsap kum ka CBI, Enforcement Directorate bad kiwei ki kynhun tohkit ki don ha Jylla lada ka VPP ka don jingartatien wat ïa ki pulit ban tohkit.
U Bah Prestone u la buh jingkylli ruh ïa u nongïalam ka VPP uba pynshit paidbah halor ka Lokayukta khamtam halor ka jingweng ïa ki ophisar ba la shongthait da kaba kynnoh ba ka jingweng ïa ki kan ktah ïa ka jingtohkit.
U la ong ba u Bah Ardent u kynnoh ïa ka jingujor kaba ïadei bad ka GHADC hynrei um tip ba ka jingtohkit ka la dep lut, la pyndep ïa ka ‘chargesheet’ bad ka jingmudui ka don ha Ïingkashari.
U la ong ba kane ka jingpynkhih jong u Bah Ardent ruh ka shu kut kumto namar u khlem kren eiei shuh.
U la ong ba ki jingpynkhih paidbah u Bah Ardent naduh mynshwa haduh mynta ki dei tang shiteng lynti naduh ka mat kaba ïadei bad ka aiñ shna ïing kaba u la pynkhih ha ka por ba long Myntri Rangbah u Dr Mukul Sangma bad kane ka mat ruh ka shu kut noh kumto.
