Shillong, Lber 25
Hadien ka jingjia ïashoh ïadat kaba la jia hapoh ka phyllaw jong ka skul bah North Eastern Hill University (NEHU) ha ka 25 tarik u Lber ha ka por kumba 12 baje tam eiei ha kaba u samla Easterson Sohtun uba dei u Vice-President ka North Eastern Hill University Student’s Union (NEHUSU) u la shah shoh ha ka kynhun Akhil Bharatiya Vidyarthi Parishad (ABVP) kaba la wan ban ïalehkmen Holi hapoh katei ka skulbah.
Kum ban shu kdew hangne, u samla Easter-son u la ong ba katei ka jingjia shah shoh jong u ka dei namar ba ma u ha ryngkat bad ki nongpahara jong katei ka skulbah ki la leit ban ïakren bad kitei ki briew kiba ïalehkmen Holi namar kiba bun napdeng kitei ki nongïalam ban ïalehkmen Holi kim dei satia napoh katei ka jaka pule hynrei hamar katei ka por ka la mih ka jingkynnoh ba u samla Easterson u thmu ban pynïapher jaitbynriew bad dei ha katei ka por ki la shoh ïa u.
Hadien kane ka jingjia ha katei kajuh hi ka sngi ha ka por janmiet, na ka liang ki nongïalam ka ABVP Shillong ki la wan ha Shillong Press Club ban ai ïa ka jingpynshai halor kane ka jingkynnoh ba kiba la shoh ïa u Vice-President ka NEHUSU ki dei ki dkhot jong ka kynhun ki nongïalam ka ABVP.
Haba ïakren bad ki lad pathai khubor, u State Secretary ka AVBP, u Tengku M. Marak u la ong ba kane ka jingkynnoh jong u Vice President ka NEHUSU ka long ka bym dei bad kaba bakla ha kaba u la kyntait ba ki dkhot jong ka AVBP ki donkti halor kane ka jingjia.
“Ngi la ïohi ba ka jingpynshai jong u sha ki lad pathai khubor ha kaba kane ka jingpynshai jong u ka long kaba bakla. Ka jingpynshai ba la ai da u Vice President ka NEHUSU pyrshah ïa ka ABVP ka long ka bym dei namar ngi la ïalehkmen da ka jingjai-jai bad baroh ki ïa kmen lut ha katei ka jingïalehkmen Holi”, la ong u Tengku.
U Tengku u la ïathuh ba hapdeng katei ka jingïalehkmen utei u Vice President ka NEHUSU u la wan ban pynhuri-hura ha kaba tang hapdeng katto-katne por eiei la shu ïohi ïa ka jingïashoh ïadat kaba la jia ha katei ka por hapdeng u Vice President bad kitei ki nongïalehkmen Holi.
U la ong ba utei u Vice President ka NEHUSU u dei ban ai ïa ki jingshisha da kaba sei ïa ki kyrteng jong kito ki briew kiba la shoh ïa u lym kumta ka ABVP kan ujor da ka bai mynraiñ khmat halor kane ka jingkynnoh jong utei u Vice President namar u la kynnoh ïa ka ABVP khlem da lah ban ai kano-kano ka jingpynshisha.
“Mano ba la shoh ïa u? U dei ban ai ïa ki kyrteng jong uno-uno u briew uba la shoh ïa u lym kumta ngin ujor da ka ‘Defamation Case’ pyrshah ïa u namar ba u la pynthohbria ïa ka kynhun jong ngi”, la ong u Tengku.
U Tengku u la ïathuh ba ha katei ka por ma u ruh u don lang ha katei ka jingïalehkmen Holi bad ki bor pahara ruh ki la don lang ha katei ka jaka ha kaba ki la ïathuh ha ki nongïalam ka ABVP ba u Vice President ka NEHUSU u la phah wan ïa ki ha katei ka jaka namar ba kan sa jia kaei-kaei ka jingjia hapdeng katei ka jingïalehkmen.
“Kane ka mut ba ki la don jingthmu lypa hapdeng jong ki ba kin pynkulmar hapdeng kane ka jingïalehkmen Holi”, la ong u Tengku.
Shuh shuh u Tengku u la ïathuh ruh ba ki nongïalam ka ABVP ki khlem ktah kti ïa utei u Vice President bad kane baroh ka dei tang ka jingkynnoh kaba bakla bad ka jingïaleh politik ban pynthohbria pyrshah ïa ka kynhun ABVP.
Kine ki nongïalam ka AVBP ki la ïathuh ruh ba ki don kumba saw ngut kiba la sdang ban rah kti ïa uwei u samla pule da ki tiar pynmynsaw katba ki dang ïalehkmen Holi bad ki la kynnoh ruh ba ki la don ka jingthmu naduh nyngkong ban pynmih ïa ki huri-hura.
Katei ka kynhun ka la ong ba ka jingkynnoh jong u Vice President ka NEHUSU ba uwei napdeng kitei ki nongïalehkmen Holi ba la tip kyrteng kum u Kamlesh Singh um dei napoh ka skul bah ka dei kaba bakla namar u Kamlesh Singh u dei uba pule hapoh ka IGNOU bad ka IGNOU ka don hapoh ka skul bah NEHU.
