Kyiv, Lber:
Ka tnat iada jong ka Ukraine ha ka Lah Sngi U Blei ka la pyntip ba ka Russia ka la ther bom dusmon sha ki bynta Sepngi jong ka nongbah Lviv ha ka step Sngi U Blei.
La ong ba ka Ukraine bad Russia ki la ia sdang ther bom biang markylliang bad ka long ruh tang hadien katto katne sngi ba ka Russia ka la pynbna ba ka la ioh ban kurup biang sa kawei pat ka shnong Ivanivske kaba don sha ka phang Sepngi jong ka nongbah Bakhmut.
Ha kawei pat ka jingjia la ong ba ka jingshah thombor jong ka Russia ha ki lehnoh ha ka Sngi Thohdieng jong kane ka taiew ba la dep, ka la shim palat 133 ngut ki mynsiem briew ha katei ka sngi. Ia katei ka kam thombor la shim jingkit khlieh da ki kynhun lehnoh Islamic State ha ka step kaba bud.
U Lat ka Lviv, Maksym Kozytskyi u la iathuh ba wat ha ka distrik Stryi, kaba don sha ka phang Shathie jong ka nongbah Lvivi bad kumba 80 Kilometre lane 50 mile na khappud. Ka Poland ruh ka la shah thombor bad shah ther bom biang ha ki shipai ka Russia ha kane ka sien.
Ki heh bad ki bor pyniaid jong ka nongbah Kyiv bad ki thaiñ ba marjan jong ka nongbah Kyiv bad Lviv ki la iathuh ba ki la don bun ki jingjulor ha Ukraine ha katei ka jingleit thombor biang jong ka Russia ha kane ka sien bad bun tylli ki ïing mala ki la khyllem bad julor ha ka jingbthei ki ‘namding bad la ther da ki shipai Russia. Hynrei la ong pat ba ym shym la ioh jingtip ban don kiba ngat ne shah ktah ha kitei ki jingjia ther bom jong ka Russia sha Ukraine.
Kumta, ka la don ka jingduh bording ilektrik ha bun tylli ki thaiñ Mihngi ka Dnipropetrovsk naduh katei ka miet ba ka Russia ka leit thombor biang sha Ukraine.
Ka tnat iada jong ka Ukraine ka la pyntip ba ka Russia ka la pynher haduh 29 tylli ki ‘namding bad palat 28 tylli ki drone ka la phah leit thombor sha Ukraine ha katei ka miet baroh shi miet.
Hynrei da ka jinglah jong ka tnat iada ka Ukraine, la ioh ban siat pynbthei bad pynhap noh ia 18 tylli ki ‘namding bad 25 tylli ki drone kiba leit poi sha katei ka nongbah ha katei ka miet.
Kumta, la ong ba ka Russia ha kane ka por ka la sdang ban leit hiar thma jur biang ia ka Ukraine khlem da pynsngap shuh ia ki jingmaham bad ki jingpynngat kyndon jong ki ri bapher bapher ka pyrthei bad khlem sheptieng ruh wat la ka Russia kan hap ban ïeng marwei ha kaba khatduh. Hynrei lada peit thuh mynta, la i kumba ka Russia ka mut ban pyndep beit noh ia ka jingthmu ban leit hiar thma bad ban kurup bad synshar hi noh ia ka Ukraine.
