Tura, Lber 25
U Chief Executive Member (CEM) barim ka Garo Hills Autonomous District Council (GHADC) uba bat ruh ïa ka kam Vice-President ka BJP ha Meghalaya, u Dipul R Marak, u la mih noh na kane ka seng da kaba pyni ba ka dei namar ka daw shimet.
Ha ka shithi ba u la phah sha u President ka BJP Meghalaya, u Rikman G Momin, u Dipul u la pyntip ba u la rai ban iehnoh ïa ka jinglong kum u Vice President ka BJP Meghalaya bad u nongpeit pyrman ïa ka 2-Tura Lok Sabha Constituency.
Ha kajuh ka por, u la ong ba u la iehnoh ruh kum u dkhot ka seng na ka Rangsakona Mandal.
Ha kane ka shithi, u Dipul u la ong ba u la iehnoh ïa ka seng namar ki daw shimet.Kane ka jingiehnoh kam jong u Dipul ka la wan hadien ba ki nongïalam ka BJP na Delhi ki la rai ban ym pynïeng kyrtong na Shillong bad Tura ha kane ka ilekshon MP, bad la bthah ïa ka seng ha Meghalaya ba kan kyrshan ïa ki kyrtong ba la pynïeng da ka National People’s Party (NPP).
