Shillong, Lber 25
Bun ngut ki kyrtong kiba ïakhun ïa ka ilekshon MP na Shillong Lok Sabha konstitwensi kin leit ban thep kyrteng ha ka Sngi Ba-ar.
Kine ki kynthup ïa u MP ka Shillong u Bah Vincent H Pala, uba dei u kyrtong ka Congress, u Bah Robertjune Kharjahrin uba dei u kyrtong ka United Democratic Party (UDP) uba kyrshan lang da ka kynhun Regional Democratic Alliance (RDA) nalor u kyrtong ka Voice of People Party u Bah Ricky AJ Syngkon.
La ïathuh ba u kyrtong shimet u Prof Lakhon Kma ruh u la pynkhreh ban thep kyrteng ha ka Sngi Ba-ar.
Da ka jingwan jong kine lai ngut ban thep kyrteng hakhmat u Returning Officer uba dei ruh u Deputy Commissioner ka East Khasi Hills district, ka surok bah kaba lam sha shlem treikam u DC kan dap da ki paidbah nongkyrshan jong kine ki kyrtong kiba mih ban ïakhun ïa kane ka ilekshon. Ka tarik khatduh ban thep kyrteng ka dei ha ka 27 tarik mynta u bnai bad ka sngi ban khmih bniah ïa ki kot thep kyrteng kan dei ha ka 28 tarik.
Ka jingthep ‘vote’ ha Shillong bad Tura Lok Sabha konstitwensi kan dei ha ka wat banyngkong jong ka jingthep ‘vote’ kata ha ka 19 tarik Ïaïong. Ban ñiew ‘vote’ hap ap haduh 2 bnai duna namar yn khyllie ïa ki ‘vote’ haduh ka 4 tarik u Jylliew 2024.
