Dehradun, Lber:
Kum shi bynta ban bteng ïa ki jingtreikam hapoh ka seng na ka bynta ban pynbiej bad ban khring ïa ki nongïalam ba pawkhmat jong kiwei pat ki seng, ka seng BJP ka la lah da ka jingjop ban wanrah ha ka sien kaba lai ïa u MLA jong ka seng Bahujan Samaj Party (BSP) u Haridas na Jhabrera Assembly konstiwensi ha Haridwar Parliamentary konstitwensi sha ka kynhun jong ka seng.
Ka seng BJP ka la ïaleh ban khring ïa kiba bun ki nongïalam ba pawkhmat.
Kumba la sakhi, la ong ba kiba bun ki dkhot jong ka seng Congress nalor ki katto-katne ngut kiba na ka seng Aam Aadmi Party dang shen ki la leit ban pynïasoh bad ka seng BJP.
Ka seng BJP ka la pynïakhun ïa u Myntri Rangbah barim jong ka jylla Uttarakhand u Trivendra Singh Rawat na ka bynta ka Haridwar Lok Sabha konstitwensi, ha kaba ha ka jaka jong u MP u ban sa kut noh ka samoi treikam u Ramesh Pokhriyal Nishank. Khnang ban lait na ki jingshah ktah ha ki nongkyrshan jong u Nishank bad ban pyntikna ha ka ban lah ban ïalap ilekshon ha ka rukom kaba kyrpang na ka bynta u Trivendra, la i kumba ka seng BJP ka la ïaleh ban thom ha kaba ïadei bad ka jingïakhun ïa ka ilekshon ban wan ha Haridwar.
Naduh ba la sdang ïa ka Uttarakhand, ka seng BSP ka la ïaleh ban pynïatylli ha kaba ïadei bad ka jingïadei bad ki nongthep vote ha ka thaiñ Haridwar bad Roorkee.
Ka jingpynrung ïa u Haridas hapoh ka seng BJP la i kumba kan sa ktah jur ïa ka seng BSP ha kaba ïadei bad ka jingleit kyrshan ïa ka seng BJP, ha kaba kane kan sa ailad ïa kane ka seng ba kan sa ïoh jingkyrshan ha kane ka thaiñ.
“Da ka jingleit pynïasoh jong u heh nongïalam u Haridas bad ka seng, u Myntri Rangbahduh u Narendra Modi u la ïoh jingkyrshan na baroh ki jait niam, ki kynhun jait bynriew, na ki thaiñ bad na ki Devbhoomi,” la ong u President jong ka seng BJP ha ka jylla u Mahender Bhatt.
U President jong ka seng BSP ha ka jylla u Chaudhary Shishpal u la ong, “U Haridas um shym don hapoh ka seng BSP, u la dep ban mih lypa na ka seng”.
Ha kaba ïadei bad kawei pat ka bynta, la ïathuh ba ka seng Congress ka la ai ïa ka rai kaba khatduh ha kaba ïadei bad ka jingwanrah ïa ka thup kyrteng jong ki kyrtong ki ban sa ïakhun na Haridwar bad Nainital konstitwensi.
