Mawkyrwat, Lber 25
Tang hadien khyndiat sngi ba ka Bharatiya Janata Party (BJP) ka la pynbna ba kan nym pynïeng kyrtong ha ka ilekshon MP sha Lok Sabha bad ban ai jingkyrshan pura ïa ka seng NPP ha baroh ar tylli ki Parliamentary konstitwensi kata na Shillong bad Tura seat, ha ka 25 tarik u Lber 2024 ki nongïalam bad ki nongkyrshan ka BJP na Ranikor konstitwensi ki la mih shakhmat ban pynpaw pyrthei ba kin ai jingkyrshan noh ïa u kyrtong ka Congress u Bah Vincent H Pala ha kane ka ilekshon MP kaba mynta.
Kane ka jingwan ai jingkyrshan jong kine ki nongïalam ka BJP Ranikor Mandal ka dei ka jingïasngewthuh jingmut lang bad u MLA barim ka Ranikor konstitwensi u Martin M Danggo, la ïathuh uwei na ki nongïalam.
Kine ki nongïalam jong ka BJP na Ranikor konstitwensi ki kynthup ïa u Bah German Nongsiang, Bah Manstudy Nongrem, CEM barim ka KHADC lem bad kiwei kiwei.
Shuh shuh hadien ba ka HSPDP ka la rai ban nym pynïeng kyrtong ha kane ka ilekshon bad rai ban ïatreilang bad ka seng UDP hapoh ka kynhun synrop jong ka RDA, u Bah Medalsing Lyngdoh lem bad ki nongkitkam ka seng HSPDP Mawkyrwat konstitwensi ki la kyntait ban ai jingkyrshan ïa ka RDA ha kaba ki la ieh kam noh na ka HSPDP bad leit pynïasoh ïalade bad ka seng Congress.
Ïa u Bah Medalsing bad ki nongkyrshan ka HSPDP Mawkyrwat ha kane ka sngi la ïoh ban pdiang burom da u Bah Vincent H Pala, President ka Meghalaya Pradesh Congress Committee ha ryngkat ka jingdonlang u Bah Gabriel Wahlang, MLA ka Nongstoiñ konstitwensi.
Nalor ki nongkyrshan ka BJP bad HSPDP, ha kane kajuh ka sngi la sakhi ruh ïa ka jingwan pynïasoh u Vice President ka seng Trinamool Congress Mawkyrwat Block u Bah Kordorlin Kharlyngdoh ryngkat bad ka kynhun.
Ha kane ka jingïalang kaba la long ha Mawkyrwat Dorbar Hall naduh ki nongkyrshan barim ka seng Congress bad kiba dang wan pynïasoh da kawei ka sur ki la rai ban pynjop donburom ïa u Bah Vincent H Pala napoh Mawkyrwat bad Ranikor konstitwensi ha kane ka ilekshon Lok Sabha 2024.
