Patna, Lber:
Ka seng Janata Dal (United) ne ka JD(U), ha ka Sngi U Blei ka la pynbna ïa ki kyrteng jong ki kyrtong na ka bynta baroh 16 tylli ki Lok Sabha konstitwensi ki ban sa ïakhun ïa ka ilekshon ha Bihar, ha kaba 40 tylli ki Lok Sabha konstitwensi kin sa pynlong ïa ka jingthep vote ha ki 7 tylli ki bynta ka ban sdang naduh ka 19 tarik, Ïaïong. Ar ngut ki MP ki la shah pynhap noh, ha kaba la ailad ïa ki nongïalam na ki kynhun ba dang sahdien ba kin don bynta ha ka jingïakhun ïa ka ilekshon.
Kane ka jingpynbna ka la long shi taïew hadien ba ka kynhun synrop National Democratic Alliance (NDA) ka la pynbna ïa ka seng kaba san kaba la don bynta ha ka jingïasam ïa ki kongstitwensi kumba la pynbeit ha Bihar, ha kaba ka seng Bharatiya Janata Party (BJP) kan sa ïakhun ha ki 17 tylli ki konstitwensi, kajuh kumba long ha u snem 2019, bad ka seng kaba la ïatreilang bad ka JD(U) ka la ïoh ban ïakhun na ki 16 tylli ki konstitwensi, kaba duna kawei ban ïa u snem 2019.
Kane ka dei ka sien kaba nyngkong ba ka seng BJP kan sa ïakhun kham bun ki konstitwensi ban ïa ka seng JD(U). Ka kynhun jong u Chirag Paswan ka Lok Janshakti Party (LJP) kan sa ïakhun ha san tylli ki konstitwensi, katba ka seng jong u Upendra Kushwaha ka Rashtriya Lok Samta Party (RLSP) bad jong u Jitan Ram Majhi ka Hindustan Awam Morcha (Secular) kin sa ïakhun mar ar tylli ki konstitwensi.
Ka General Elections ha Bihar kan sa long ha baroh 7 tylli ki bynta naduh ka 19 tarik, Ïaïong haduh ka 1 tarik, Jylliew na ka bynta ban jied ïa ki 40 ngut ki dkhot jong ka Lok Sabha kaba 18.
Ha ka thup kyrteng, u Myntri Rangbah ka jylla u Nitish Kumar uba la lam khmat ïa ka seng JD (U) ka la pynrung kyrteng ïa ki 12 ngut ki MP kiba mynta, bad la pynhap noh ïa ar ngut kiba kynthup ïa u Sunil Kumar Pintu na Simatarhi Sheohar bad ka Kavita Singh na Siwan.
