Shillong, Lber 25
Ka ktem jong ka seng Congress hapoh ka Mylliem konstitwensi ka la pra phom hadien ka jingmih noh jong ki nongïalam ryngkat spah ngut ki nongkyrshan da kaba kynnoh ba wat hadien shisnem ba la long MLA, u Bah Ronnie V Lyngdoh um shym la lah ban ïarap ïa ki paidbah.
Kane ka jingleit ïasoh jong kine nongkyrshan ka Congress sha ka NPP ka la long hadien ka jingïasyllok kaba la katto-katne bad u Adviser jong ka NPP Mylliem Block u Bah Daniel M Thangkhiew, uba la trei shitom ban wanrah ïa kine ki samla sha ka sem ka NPP.
Ïa kine ki nongkyrshan ka Congress hapoh ka jingïalam jong u samla Kerlang Thangkhiew, la pdiang sngewbha sha ka sem ka NPP ha ka jingïalang kaba la pynlong ha Indoor Hall ka Nongkseh ha ka Lah Sngi U Blei da ki nongïalam ka NPP kiba kynthup ïa ki MLA u Bah Wailadmiki Shylla bad Bah Banteidor Lyngdoh, u MLA barim ka Mylliem Bah Hamletson Dohling, u Treasurer ka NPP Bah Daniel M Thangkhiew, u Nongaiktien ka NPP Bah HM Shangpliang bad ki nongïalam ka National People’s Youth Front (NPYF).
“Wat la tam ïa ka shi snem naduh ba la jop bad long MLA u Bah Ronnie V Lyngdoh, hynrei um shym la lah satia ban ïarap ïa ki paidbah, kumta ka long kaba eh ïa ngi kum ki nongkyrshan katno eh ngin lah ban ïarap,” la ong u samla Kerlang Thangkhiew haba ai jingkren ha ka jingïalang. Kane ka jingwan pynïasoh ki nongkyrshan na kiwei pat ki seng, ka la nang aibor bad pynlong ïa ka NPP ba kan nang khlaiñ ha ka jingpynkhreh ïa ka ilekshon sha ïingdorbar Lok Sabha.
Haba ai jingkren ha kane ka sngi, u Bah Wailadmiki u la ong ba ka Mylliem ka long kaba bhabok, ka don ïa ar ngut ki rangbah ba don ha syndah u Myntri Rangbah, kata u Bah Daniel bad Bah Hamlet.
“Nga la kyndit ban ïoh jingtip ba da ki spah ngut ki samla Congress kin wan pynïasoh sha ka NPP, tang hadien shi snem ba jop ka Congress ha Mylliem. Kane ka pyni ïa ka jingstad jong ki nongjied, kiba sngewthuh ba kumno yn bud ïa uba shong sha jngai na u Myntri Rangbah bad ieh noh ïa ki ar ngut kiba shong ha syndah jong u Myntri Rangbah,” la ong u Bah Wailadmiki.
U Bah Wailadmiki uba dei ruh u Working President ka NPP Meghalaya, u la ong ba kum ki nongkyrshan kiba dang wan pynïasoh sha ka NPP ba kim dei ban sngew marwei, namar ki bun ki nongïalam bad ki MLA ruh kiba dang shu wan rung shen sha ka NPP bad ba kin dang don bun ki ban dang wan.
U Bah Hamlet u la ong ba wat la u la shah rem ha ka ilekshon MLA, hynrei un bteng ban trei ïa ki kam kumba u la trei baroh shi katta.
“Nga lada rem ilekshon ruh kam lei-lei, hynrei ka mynsiem jong nga ban rem da lei-lei ngan nym shah. Nga dei u riewïaleh, u briew ba don jingmut ba skhem, lah ban rem ilekshon hynrei mynsiem ban trei bad shakri jaidbynriew da lei-lei kan nym rem,” la ong u Bah Hamlet.
