Nongstoiñ, Lber 25
Ka kynhun ïalehkai jong ka Ri Bhoi United ka la ïoh ban khur ïa ka jingjop ha ka semi final (fist leg) pyrshah ïa ka Peerles SC kaba na Kolkata ha ka lympung Invitation Knockout Football Tournament ba la pynïaid da ka New Nongstoiñ Sport Social Cultural Club (NNSSCC).
Haba phai sha katei ka jingïakhun semi final hapdeng kitei ki ar tylli ki kynhun kaba la long ha ka lah sngi U Blei ha madan New Nongstioñ ka la long shisha kaba itynnad ha kaba ka Ri Bhoi United ka la ïoh ban thep haduh 4 tylli ki kol, katba ka Peerless SC ka la ïoh ban thep tang ar kol.
U Raikut Buam u la ïoh ban thep ar kol. Kane ka la wan urlong ha ka minit kaba 15 bad 90. Ïa kiwei pat ki ar kol la thep da Joseph (27) bad u Nickhelson Bina ha ka minit kaba 86. Na ka liang ka Peerles ka la lah ban pynphai kylla lyngba u Mendy ha ka minit kaba 75 & 90+1.
Kitei ki ar tylli ki kynhun kin hap ban ïakhun biang sa ïa ka semi final (second leg) bad ka kynhun kaba ïoh tam kol kan ïoh ban rung sha ka final jong katei ka lympung.
Shuh shuh ha katei ka sngi ïa ka nam Man of the Match la ïoh ban khur da u Pragyan na ka Ri Bhoi United.
Na kaliang ka NNSSCC ka la pyntip ba ka jingïalehkai semi final (2nd leg) hapdeng ka Shillong Lajong pyrshah ïa ka Blue Bomber’s kan long ha ka 28 tarik mynta u bnai ha ka por 2 baje janmiet.
