New Delhi, Lber:
U Myntri ka tnat kam bar ri jong ka India, u S. Jaishankar haba iakren bad u Myntri ka Russia- u Sergei Lavrov ha ka sngi ba la lah, u la pynpaw ka jingsngewkhia kaba jur halor ka jingshah thombor jong ka Russia ha ki kynhun lehnoh kiba la leit ban thombor da kaba synreit kuli naphang bad kawang bom ha ka jaka paidbah ha Crocus City Hall kaba don hapoh ka nongbah Moscow katba ki paidbah ki dang leh kmen ha katei ka sngi ba don ka put-ka tem. Hynrei kaba sngewsih ka long ba haduh 133 ngut ki la khlad noh na katei ka jingjia ha katei ka sngi.
Kumta, na ka liang ka India, u Jaishankar u la phah ia ka khubor sngewlem da ka jingsngewkhia mynsiem sha ka Russia halor katei ka jingshem lanot jong ka Moscow ha ka taiew ba la lah.
Ha ka Sngi Saitjaiñ, u Myntri Rangbahduh ka India- u Narendra Modi ruh u la pynrem jur halor katei ka kam thombor jong ki lehnoh ia ka nongbah Moscow jong ka Russia bad ha kajuh ruh ka por u Modi u la pynpaw ka jingpyrshah kaba jur ia kitei ki kynhun lehnoh, bad u la ong ruh ba ka India ka ïeng ryngkat bad ka Russia ban tehlakam ia kitei ki kam thombor jong ki lehnoh.
U Modi haba pyllait ia ka jingkren jong u lyngba ka rynsan ‘Social Media’ ka ‘X’, u la ong ba ka India ka pynrem jur ia katei ka jingleit thombor jong kitei ki lehnoh khamtam ha katei ka jaka paidbah kaba heh katba ki paidbah ki dang leh kmen- leh sngewbha hynrei ki la shu duh ei ia ka jingim bad ka mynsiem ba kordor namar ka jing-leh khawpud jong kitei ki lehnoh IS. Namarkata, u la ong ba ka India ka ïeng ryngkat bad ka Russia ha kane ka sien namar katei ka jingleit thombor jong katei ka kynhun lehnoh ha katei ka taiew ba la lah ka long ka bym lah ban pdiang.
La ong ba kane ka la jia ha ka janmiet jong ka Sngi Thohdieng hapoh ka Crocus City Hall kaba don hapoh Krasnogorsk jong ka nongbah Moscow ha Russia. Katei ka jaka paidbah kaba heh bha ka la jan dap bad la don kumba 7,500 ngut eiei ki paidbah ha ka por ba kitei ki lehnoh ki leit ban rung bad thombor ha katei ka sngi.
