Shillong, Lber 25
Ha kawei ka jingjia shah shoh kaba la jia ha ka 25 tarik u Lber 2024 ha ka por kumba 12 baje tam eiei, uwei u samla ba la tip kyrteng kum u Easterson Sohtun bad uba dei ruh u Vice-President ka North Eastern Hill University Student’s Union (NEHUSU) u la shah shoh ha ka kynhun Akhil Bharatiya Vidyarthi Parishad (ABVP) kaba la wan ban ïalehkmen Holi hapoh katei ka skul bah NEHU.
Ka ABVP ka dei ka seng ki samla pule jong ka RSS bad ka NEHUSU pat ka dei ka seng ki samla pule ka skul bah NEHU.
Haba ïoh ban ïakren bad u samla Easterson uba la shah shoh, u la ïathuh ba katba u dang leit kren ïa ki samla pule ka NEHU kiba ïalehkmen Holi hajan ka pung kaba pynlang um, u la lap ba ki don ruh kiwei pat ki bym dei ki samla pule na ka skul bah NEHU bad ki don katto-katne ngut kiba dei ki nongïalam jong ka ABVP kiba la don ha katei ka jinglehkmen kim dei satia ki briew kiba na katei ka jaka pule hynrei ki dei kiba nabar suda. U la ruh kumba ju long hapoh katei ka skulbah kam ju shah ban wan ïalehkmen niam ïa ki briew kiba nabar lait noh tang ki khynnah pule kiba dei na katei hi ka jaka pule.
“Ngim don daw ïa ka jingïalehkmen jongno-re-jongno namar ngi im ha ka ri laitluid kaba ngi lah ban mane ïano-ïano bad ka NEHU ruh ka don bun ki briew kiba dei na ki kynhun niam bad ki jaitbynriew bapher-bapher bad ïa ka jinglehñiam jongngo-jongno ngim ju pyrshah, hynrei haba ngi leit peit pat hangto, ki don katto-katne ngut ki bym shym la dei ki khynnah pule ka NEHU bad ki don katto-katne ngut kiba dei ki nongïalam jong ka ABVP”, la ong u samla Easterson. Haba ïohi ïa kane ka jingthmu lehkmen niam jong ki briew kiba nabar katei ka jaka pule, na ka liang une u samla uba dei u Vice President ka NEHUSU u la ong ba u khlem leit da ka bor ban ïashoh hynrei u la leit khot da ki nongpahara ba kin phah leit noh ïa kitei ki briew kiba wan nabar. Ha mar kata ka por ba ki dang ïakren, kitei ki briew nabar kiba don kumba 20 ngut ki la shoh pynban ïa u samla Easterson Sohtun. U la ïathuh ruh ba ha katei ka por kitei ki briew ki la kynnoh ba ki Khasi ki la pyrshah ïa ka Holi da kaba thmu ban pynïapher jaitbynriew hapdeng ki Khasi bad ki bym dei ki Khasi.
“Ngi la khot ïa ki nongpahara ba kin leit ïakren ïa kitei ki briew ba kin ym wan leh politik hapoh NEHU lyngba kine ki jingïalehkmen bad ha ka por ba ngi leit ïakren ki la ong kynsan ba ki Khasi ki pyrshah ïa ka Holi, ki kwah ban shna ishu hapdeng ka jingïapher jaitbynriew Khasi bad kiba na rithor”, la ong u sama Easterson.
Shuh shuh utei u samla Easterson u la ïathuh ba ha katei ka por ki la don kiba ong ban ring da ka dur khih hynrei na ka liang u samla Easterson u la knieh ïa ka mobile phone jong utei u khynnah bad ha katei ka por ki la sdang ban shoh ban dat ïa u.
“Ba kin ïashad ïakmen ngim don daw hynrei ban pynlong da kino-kino ki kynhun kiba nabar ba kin wan leh trai hapoh ka ri jong ngi, ngin nym aili”, la ong u samla Easterson.
Ha katei ka jingjia shah shoh, une u samla u la shah shoh bad shah tar ka sopti kaba u la phong bad u la mynsaw na ki bynta ba shadien jong ka met bad la rah noh ïa u sha Civil Hospital Shillong ban ïoh ïa ka jingsumar.
Halor kane ka jingshah shoh, utei u Vice President u la ong ba u la leit buh noh da ka ejahar hapoh Mawkynroh Outpost halor kane ka jingjia pyrshah ïa ki laingut ki nongïalam ka ABVP kiba la donkti ban shoh ïa u bad kiba la thmu ban pharep ïa u ba um shah ban lehkmen Holi ïa ki.
