Shillong, Lber 25
U Working President ka NPP Meghalaya, Bah Wailadmiki Shylla uba dei u MLA ka Jowai u la ong, ba ka seng Voice of the People Party (VPP) tang ban myntoi ïalade kam salia wat ban shet bad shukor ïa ka jaidbynriew.
U Bah Wailadmiki haba kren ha ka jingïalang pdiang ïa ki samla Congress sha ka NPP ha Nongkseh ha ka Lah Sngi U Blei u la ong, ka VPP mynta ka la wan pynsngewthuh bakla ïa ki paidbah da kaba ong ba ka ieid jaidbynriew, hato ka jingieid jaidbynriew ka mut ban ïalam ïa ki samla sha surok bad ban pynsngewthuh bakla ïa ki samla?
“Mynta ki ïakren ïa ka Reservation Policy, lada pyntreikam ïa ka, hato baroh yn ïa ïoh kam? Ka jubab ka long em yn nym lah, namar katkum ki jingkheiñ (data) bad jurip ba la leh, man la u snem ki don haduh 60 ne 70 hajar ki samla ba pynrung kyrteng ban wad kam sorkar, katba ki kam sorkar ba lait ki long tang kumba 6 ne 7 hajar,” la ong u Bah Wailadmiki.
Kumta ym don ban ïalam ne pynsngewthuh bakla hynrei dei ban pynsngewthuh ïa ki samla ba wat lada treikam ka Reservation Policy ruh yn nym ïoh kam sorkar baroh, hynrei tang ban ïoh jingmyntoi lade kim salia ban thok bad shukor ïa ka jaidbynriew, la ong utei u nongïalam ka NPP.
U la ong ba ka jingwan jong katei ka seng saiñ pyrthei thymmai, ka la long shisha kumba wan u ‘lap praw, bad hiar wut-wut bad baroh ki shongshit, ki sngewtynnad bad sngewbang. U la ong ruh ba lada kane ka seng kan neh slem, kan sa pynjot ïa ki shnong ki thaw bad ïa ka jylla hi baroh kawei.
U Bah Wailadmiki u la ong, “Lada ieid shisha ïa ka jaidbynriew leh kumba leh u Myntri Rangbah, namar haba la sngewthuh ba yn nym lah ban ai kam sorkar lut ïa baroh, u la wanrah da ki skhim bapher-bapher ban plie lad ïa ki samla ba kin ïoh ban seng kam seng jam lajong khnang ba kin lah ban ïeng ha la ki jong ki kjat.
U la ong ba kane ka jingpyrshang jong u Myntri Rangbah kam dei tang ban plie lad ïa ki samla ba kin lah ban seng kam lajong hynrei lyngba kane, kin lah pat ban ai kam ai jam ïa ki 10 ne 15 ngut ki samla bad lyngba kane yn lah ban plie lad ha ka ïoh kam ïoh jam ki samla.
“Hynrei ka long kaba sngewsih ba mynta yn wan batai da u briew uba la rem ilekshon ban ïa uba jop ilekshon san sien kynthih, hato lada ym dei ba trei hok, ki paidbah kin pynjop,” la ong u Bah Wailad.
U Bah Wailadmiki u la pynkynmaw ruh ba ha ka por ba u Bah Ardent u don ha ka UDP, u la ong ba dei tang ka seng UDP kaba ieid jaidbynriew, hadien ba u la pynïasoh sha ka HSPDP pat u la ong ba dei tang ka HSPDP kaba ieid jaidbynriew bad hadien ba u la leit ban kyrshan ïa ka Congress, u la ong ba ki seng riewlum kim long namar tang la jop ki la leit ïasoh bad ki seng rithor bad mynta pat u la thaw ïa la ka jong ka seng riewlum.
